Rig Veda · Chapter 10.117

na vā u devāḥ kṣudham id vadhaṁ dadur utāśitam upa gacchanti mṛtyavaḥ |
uto rayiḥ pṛṇato nopa dasyaty utāpṛṇan marḍitāraṁ na vindate ||

ya ādhrāya cakamānāya pitvo 'nnavān san raphitāyopajagmuṣe |
sthiram manaḥ kṛṇute sevate puroto cit sa marḍitāraṁ na vindate ||

sa id bhojo yo gṛhave dadāty annakāmāya carate kṛśāya |
aram asmai bhavati yāmahūtā utāparīṣu kṛṇute sakhāyam ||

na sa sakhā yo na dadāti sakhye sacābhuve sacamānāya pitvaḥ |
apāsmāt preyān na tad oko asti pṛṇantam anyam araṇaṁ cid icchet ||

pṛṇīyād in nādhamānāya tavyān drāghīyāṁsam anu paśyeta panthām |
o hi vartante rathyeva cakrānyam-anyam upa tiṣṭhanta rāyaḥ ||

mogham annaṁ vindate apracetāḥ satyam bravīmi vadha it sa tasya |
nāryamaṇam puṣyati no sakhāyaṁ kevalāgho bhavati kevalādī ||

kṛṣann it phāla āśitaṁ kṛṇoti yann adhvānam apa vṛṅkte caritraiḥ |
vadan brahmāvadato vanīyān pṛṇann āpir apṛṇantam abhi ṣyāt ||

ekapād bhūyo dvipado vi cakrame dvipāt tripādam abhy eti paścāt |
catuṣpād eti dvipadām abhisvare sampaśyan paṅktīr upatiṣṭhamānaḥ ||

samau cid dhastau na samaṁ viviṣṭaḥ sammātarā cin na samaṁ duhāte |
yamayoś cin na samā vīryāṇi jñātī cit santau na samam pṛṇītaḥ ||