Rig Veda · Chapter 10.082

cakṣuṣaḥ pitā manasā hi dhīro ghṛtam ene ajanan nannamāne |
yaded antā adadṛhanta pūrva ād id dyāvāpṛthivī aprathetām ||

viśvakarmā vimanā ād vihāyā dhātā vidhātā paramota saṁdṛk |
teṣām iṣṭāni sam iṣā madanti yatrā saptaṛṣīn para ekam āhuḥ ||

yo naḥ pitā janitā yo vidhātā dhāmāni veda bhuvanāni viśvā |
yo devānāṁ nāmadhā eka eva taṁ sampraśnam bhuvanā yanty anyā ||

ta āyajanta draviṇaṁ sam asmā ṛṣayaḥ pūrve jaritāro na bhūnā |
asūrte sūrte rajasi niṣatte ye bhūtāni samakṛṇvann imāni ||

paro divā para enā pṛthivyā paro devebhir asurair yad asti |
kaṁ svid garbham prathamaṁ dadhra āpo yatra devāḥ samapaśyanta viśve ||

tam id garbham prathamaṁ dadhra āpo yatra devāḥ samagacchanta viśve |
ajasya nābhāv adhy ekam arpitaṁ yasmin viśvāni bhuvanāni tasthuḥ ||

na taṁ vidātha ya imā jajānānyad yuṣmākam antaram babhūva |
nīhāreṇa prāvṛtā jalpyā cāsutṛpa ukthaśāsaś caranti ||