Rig Veda · Chapter 10.079

apaśyam asya mahato mahitvam amartyasya martyāsu vikṣu |
nānā hanū vibhṛte sam bharete asinvatī bapsatī bhūry attaḥ ||

guhā śiro nihitam ṛdhag akṣī asinvann atti jihvayā vanāni |
atrāṇy asmai paḍbhiḥ sam bharanty uttānahastā namasādhi vikṣu ||

pra mātuḥ prataraṁ guhyam icchan kumāro na vīrudhaḥ sarpad urvīḥ |
sasaṁ na pakvam avidac chucantaṁ ririhvāṁsaṁ ripa upasthe antaḥ ||

tad vām ṛtaṁ rodasī pra bravīmi jāyamāno mātarā garbho atti |
nāhaṁ devasya martyaś ciketāgnir aṅga vicetāḥ sa pracetāḥ ||

yo asmā annaṁ tṛṣv ā3dadhāty ājyair ghṛtair juhoti puṣyati |
tasmai sahasram akṣabhir vi cakṣe 'gne viśvataḥ pratyaṅṅ asi tvam ||

kiṁ deveṣu tyaja enaś cakarthāgne pṛcchāmi nu tvām avidvān |
akrīḻan krīḻan harir attave 'dan vi parvaśaś cakarta gām ivāsiḥ ||

viṣūco aśvān yuyuje vanejā ṛjītibhī raśanābhir gṛbhītān |
cakṣade mitro vasubhiḥ sujātaḥ sam ānṛdhe parvabhir vāvṛdhānaḥ ||