Rig Veda · Chapter 10.067

imāṁ dhiyaṁ saptaśīrṣṇīm pitā na ṛtaprajātām bṛhatīm avindat |
turīyaṁ svij janayad viśvajanyo 'yāsya uktham indrāya śaṁsan ||

ṛtaṁ śaṁsanta ṛju dīdhyānā divas putrāso asurasya vīrāḥ |
vipram padam aṅgiraso dadhānā yajñasya dhāma prathamam mananta ||

haṁsair iva sakhibhir vāvadadbhir aśmanmayāni nahanā vyasyan |
bṛhaspatir abhikanikradad gā uta prāstaud uc ca vidvām̐ agāyat ||

avo dvābhyām para ekayā gā guhā tiṣṭhantīr anṛtasya setau |
bṛhaspatis tamasi jyotir icchann ud usrā ākar vi hi tisra āvaḥ ||

vibhidyā puraṁ śayathem apācīṁ nis trīṇi sākam udadher akṛntat |
bṛhaspatir uṣasaṁ sūryaṁ gām arkaṁ viveda stanayann iva dyauḥ ||

indro valaṁ rakṣitāraṁ dughānāṁ kareṇeva vi cakartā raveṇa |
svedāñjibhir āśiram icchamāno 'rodayat paṇim ā gā amuṣṇāt ||

sa īṁ satyebhiḥ sakhibhiḥ śucadbhir godhāyasaṁ vi dhanasair adardaḥ |
brahmaṇas patir vṛṣabhir varāhair gharmasvedebhir draviṇaṁ vy ānaṭ ||

te satyena manasā gopatiṁ gā iyānāsa iṣaṇayanta dhībhiḥ |
bṛhaspatir mithoavadyapebhir ud usriyā asṛjata svayugbhiḥ ||

taṁ vardhayanto matibhiḥ śivābhiḥ siṁham iva nānadataṁ sadhasthe |
bṛhaspatiṁ vṛṣaṇaṁ śūrasātau bhare-bhare anu madema jiṣṇum ||

yadā vājam asanad viśvarūpam ā dyām arukṣad uttarāṇi sadma |
bṛhaspatiṁ vṛṣaṇaṁ vardhayanto nānā santo bibhrato jyotir āsā ||

satyām āśiṣaṁ kṛṇutā vayodhai kīriṁ cid dhy avatha svebhir evaiḥ |
paścā mṛdho apa bhavantu viśvās tad rodasī śṛṇutaṁ viśvaminve ||

indro mahnā mahato arṇavasya vi mūrdhānam abhinad arbudasya |
ahann ahim ariṇāt sapta sindhūn devair dyāvāpṛthivī prāvataṁ naḥ ||