Rig Veda · Chapter 10.049

ahaṁ dāṁ gṛṇate pūrvyaṁ vasv aham brahma kṛṇavam mahyaṁ vardhanam |
aham bhuvaṁ yajamānasya coditāyajvanaḥ sākṣi viśvasmin bhare ||

māṁ dhur indraṁ nāma devatā divaś ca gmaś cāpāṁ ca jantavaḥ |
ahaṁ harī vṛṣaṇā vivratā raghū ahaṁ vajraṁ śavase dhṛṣṇv ā dade ||

aham atkaṁ kavaye śiśnathaṁ hathair ahaṁ kutsam āvam ābhir ūtibhiḥ |
ahaṁ śuṣṇasya śnathitā vadhar yamaṁ na yo rara āryaṁ nāma dasyave ||

aham piteva vetasūm̐r abhiṣṭaye tugraṁ kutsāya smadibhaṁ ca randhayam |
aham bhuvaṁ yajamānasya rājani pra yad bhare tujaye na priyādhṛṣe ||

ahaṁ randhayam mṛgayaṁ śrutarvaṇe yan mājihīta vayunā canānuṣak |
ahaṁ veśaṁ namram āyave 'karam ahaṁ savyāya paḍgṛbhim arandhayam ||

ahaṁ sa yo navavāstvam bṛhadrathaṁ saṁ vṛtreva dāsaṁ vṛtrahārujam |
yad vardhayantam prathayantam ānuṣag dūre pāre rajaso rocanākaram ||

ahaṁ sūryasya pari yāmy āśubhiḥ praitaśebhir vahamāna ojasā |
yan mā sāvo manuṣa āha nirṇija ṛdhak kṛṣe dāsaṁ kṛtvyaṁ hathaiḥ ||

ahaṁ saptahā nahuṣo nahuṣṭaraḥ prāśrāvayaṁ śavasā turvaśaṁ yadum |
ahaṁ ny a1nyaṁ sahasā sahas karaṁ nava vrādhato navatiṁ ca vakṣayam ||

ahaṁ sapta sravato dhārayaṁ vṛṣā dravitnvaḥ pṛthivyāṁ sīrā adhi |
aham arṇāṁsi vi tirāmi sukratur yudhā vidam manave gātum iṣṭaye ||

ahaṁ tad āsu dhārayaṁ yad āsu na devaś cana tvaṣṭādhārayad ruśat |
spārhaṁ gavām ūdhaḥsu vakṣaṇāsv ā madhor madhu śvātryaṁ somam āśiram ||

evā devām̐ indro vivye nṝn pra cyautnena maghavā satyarādhāḥ |
viśvet tā te harivaḥ śacīvo 'bhi turāsaḥ svayaśo gṛṇanti ||