Rig Veda · Chapter 10.046

pra hotā jāto mahān nabhovin nṛṣadvā sīdad apām upasthe |
dadhir yo dhāyi sa te vayāṁsi yantā vasūni vidhate tanūpāḥ ||

imaṁ vidhanto apāṁ sadhasthe paśuṁ na naṣṭam padair anu gman |
guhā catantam uśijo namobhir icchanto dhīrā bhṛgavo 'vindan ||

imaṁ trito bhūry avindad icchan vaibhūvaso mūrdhany aghnyāyāḥ |
sa śevṛdho jāta ā harmyeṣu nābhir yuvā bhavati rocanasya ||

mandraṁ hotāram uśijo namobhiḥ prāñcaṁ yajñaṁ netāram adhvarāṇām |
viśām akṛṇvann aratim pāvakaṁ havyavāhaṁ dadhato mānuṣeṣu ||

pra bhūr jayantam mahāṁ vipodhām mūrā amūram purāṁ darmāṇam |
nayanto garbhaṁ vanāṁ dhiyaṁ dhur hiriśmaśruṁ nārvāṇaṁ dhanarcam ||

ni pastyāsu tritaḥ stabhūyan parivīto yonau sīdad antaḥ |
ataḥ saṁgṛbhyā viśāṁ damūnā vidharmaṇāyantrair īyate nṝn ||

asyājarāso damām aritrā arcaddhūmāso agnayaḥ pāvakāḥ |
śvitīcayaḥ śvātrāso bhuraṇyavo vanarṣado vāyavo na somāḥ ||

pra jihvayā bharate vepo agniḥ pra vayunāni cetasā pṛthivyāḥ |
tam āyavaḥ śucayantam pāvakam mandraṁ hotāraṁ dadhire yajiṣṭham ||

dyāvā yam agnim pṛthivī janiṣṭām āpas tvaṣṭā bhṛgavo yaṁ sahobhiḥ |
īḻenyam prathamam mātariśvā devās tatakṣur manave yajatram ||

yaṁ tvā devā dadhire havyavāham puruspṛho mānuṣāso yajatram |
sa yāmann agne stuvate vayo dhāḥ pra devayan yaśasaḥ saṁ hi pūrvīḥ ||