Rig Veda · Chapter 10.039

yo vām parijmā suvṛd aśvinā ratho doṣām uṣāso havyo haviṣmatā |
śaśvattamāsas tam u vām idaṁ vayam pitur na nāma suhavaṁ havāmahe ||

codayataṁ sūnṛtāḥ pinvataṁ dhiya ut puraṁdhīr īrayataṁ tad uśmasi |
yaśasam bhāgaṁ kṛṇutaṁ no aśvinā somaṁ na cārum maghavatsu nas kṛtam ||

amājuraś cid bhavatho yuvam bhago 'nāśoś cid avitārāpamasya cit |
andhasya cin nāsatyā kṛśasya cid yuvām id āhur bhiṣajā rutasya cit ||

yuvaṁ cyavānaṁ sanayaṁ yathā ratham punar yuvānaṁ carathāya takṣathuḥ |
niṣ ṭaugryam ūhathur adbhyas pari viśvet tā vāṁ savaneṣu pravācyā ||

purāṇā vāṁ vīryā3 pra bravā jane 'tho hāsathur bhiṣajā mayobhuvā |
tā vāṁ nu navyāv avase karāmahe 'yaṁ nāsatyā śrad arir yathā dadhat ||

iyaṁ vām ahve śṛṇutam me aśvinā putrāyeva pitarā mahyaṁ śikṣatam |
anāpir ajñā asajātyāmatiḥ purā tasyā abhiśaster ava spṛtam ||

yuvaṁ rathena vimadāya śundhyuvaṁ ny ūhathuḥ purumitrasya yoṣaṇām |
yuvaṁ havaṁ vadhrimatyā agacchataṁ yuvaṁ suṣutiṁ cakrathuḥ puraṁdhaye ||

yuvaṁ viprasya jaraṇām upeyuṣaḥ punaḥ kaler akṛṇutaṁ yuvad vayaḥ |
yuvaṁ vandanam ṛśyadād ud ūpathur yuvaṁ sadyo viśpalām etave kṛthaḥ ||

yuvaṁ ha rebhaṁ vṛṣaṇā guhā hitam ud airayatam mamṛvāṁsam aśvinā |
yuvam ṛbīsam uta taptam atraya omanvantaṁ cakrathuḥ saptavadhraye ||

yuvaṁ śvetam pedave 'śvināśvaṁ navabhir vājair navatī ca vājinam |
carkṛtyaṁ dadathur drāvayatsakham bhagaṁ na nṛbhyo havyam mayobhuvam ||

na taṁ rājānāv adite kutaś cana nāṁho aśnoti duritaṁ nakir bhayam |
yam aśvinā suhavā rudravartanī purorathaṁ kṛṇuthaḥ patnyā saha ||

ā tena yātam manaso javīyasā rathaṁ yaṁ vām ṛbhavaś cakrur aśvinā |
yasya yoge duhitā jāyate diva ubhe ahanī sudine vivasvataḥ ||

tā vartir yātaṁ jayuṣā vi parvatam apinvataṁ śayave dhenum aśvinā |
vṛkasya cid vartikām antar āsyād yuvaṁ śacībhir grasitām amuñcatam ||

etaṁ vāṁ stomam aśvināv akarmātakṣāma bhṛgavo na ratham |
ny amṛkṣāma yoṣaṇāṁ na marye nityaṁ na sūnuṁ tanayaṁ dadhānāḥ ||