Rig Veda · Chapter 10.030

pra devatrā brahmaṇe gātur etv apo acchā manaso na prayukti |
mahīm mitrasya varuṇasya dhāsim pṛthujrayase rīradhā suvṛktim ||

adhvaryavo haviṣmanto hi bhūtācchāpa itośatīr uśantaḥ |
ava yāś caṣṭe aruṇaḥ suparṇas tam āsyadhvam ūrmim adyā suhastāḥ ||

adhvaryavo 'pa itā samudram apāṁ napātaṁ haviṣā yajadhvam |
sa vo dadad ūrmim adyā supūtaṁ tasmai somam madhumantaṁ sunota ||

yo anidhmo dīdayad apsv a1ntar yaṁ viprāsa īḻate adhvareṣu |
apāṁ napān madhumatīr apo dā yābhir indro vāvṛdhe vīryāya ||

yābhiḥ somo modate harṣate ca kalyāṇībhir yuvatibhir na maryaḥ |
tā adhvaryo apo acchā parehi yad āsiñcā oṣadhībhiḥ punītāt ||

eved yūne yuvatayo namanta yad īm uśann uśatīr ety accha |
saṁ jānate manasā saṁ cikitre 'dhvaryavo dhiṣaṇāpaś ca devīḥ ||

yo vo vṛtābhyo akṛṇod u lokaṁ yo vo mahyā abhiśaster amuñcat |
tasmā indrāya madhumantam ūrmiṁ devamādanam pra hiṇotanāpaḥ ||

prāsmai hinota madhumantam ūrmiṁ garbho yo vaḥ sindhavo madhva utsaḥ |
ghṛtapṛṣṭham īḍyam adhvareṣv āpo revatīḥ śṛṇutā havam me ||

taṁ sindhavo matsaram indrapānam ūrmim pra heta ya ubhe iyarti |
madacyutam auśānaṁ nabhojām pari tritantuṁ vicarantam utsam ||

āvarvṛtatīr adha nu dvidhārā goṣuyudho na niyavaṁ carantīḥ |
ṛṣe janitrīr bhuvanasya patnīr apo vandasva savṛdhaḥ sayonīḥ ||

hinotā no adhvaraṁ devayajyā hinota brahma sanaye dhanānām |
ṛtasya yoge vi ṣyadhvam ūdhaḥ śruṣṭīvarīr bhūtanāsmabhyam āpaḥ ||

āpo revatīḥ kṣayathā hi vasvaḥ kratuṁ ca bhadram bibhṛthāmṛtaṁ ca |
rāyaś ca stha svapatyasya patnīḥ sarasvatī tad gṛṇate vayo dhāt ||

prati yad āpo adṛśram āyatīr ghṛtam payāṁsi bibhratīr madhūni |
adhvaryubhir manasā saṁvidānā indrāya somaṁ suṣutam bharantīḥ ||

emā agman revatīr jīvadhanyā adhvaryavaḥ sādayatā sakhāyaḥ |
ni barhiṣi dhattana somyāso 'pāṁ naptrā saṁvidānāsa enāḥ ||

āgmann āpa uśatīr barhir edaṁ ny adhvare asadan devayantīḥ |
adhvaryavaḥ sunutendrāya somam abhūd u vaḥ suśakā devayajyā ||