Rig Veda · Chapter 10.025

bhadraṁ no api vātaya mano dakṣam uta kratum |
adhā te sakhye andhaso vi vo made raṇan gāvo na yavase vivakṣase ||

hṛdispṛśas ta āsate viśveṣu soma dhāmasu |
adhā kāmā ime mama vi vo made vi tiṣṭhante vasūyavo vivakṣase ||

uta vratāni soma te prāham mināmi pākyā |
adhā piteva sūnave vi vo made mṛḻā no abhi cid vadhād vivakṣase ||

sam u pra yanti dhītayaḥ sargāso 'vatām̐ iva |
kratuṁ naḥ soma jīvase vi vo made dhārayā camasām̐ iva vivakṣase ||

tava tye soma śaktibhir nikāmāso vy ṛṇvire |
gṛtsasya dhīrās tavaso vi vo made vrajaṁ gomantam aśvinaṁ vivakṣase ||

paśuṁ naḥ soma rakṣasi purutrā viṣṭhitaṁ jagat |
samākṛṇoṣi jīvase vi vo made viśvā sampaśyan bhuvanā vivakṣase ||

tvaṁ naḥ soma viśvato gopā adābhyo bhava |
sedha rājann apa sridho vi vo made mā no duḥśaṁsa īśatā vivakṣase ||

tvaṁ naḥ soma sukratur vayodheyāya jāgṛhi |
kṣetravittaro manuṣo vi vo made druho naḥ pāhy aṁhaso vivakṣase ||

tvaṁ no vṛtrahantamendrasyendo śivaḥ sakhā |
yat sīṁ havante samithe vi vo made yudhyamānās tokasātau vivakṣase ||

ayaṁ gha sa turo mada indrasya vardhata priyaḥ |
ayaṁ kakṣīvato maho vi vo made matiṁ viprasya vardhayad vivakṣase ||

ayaṁ viprāya dāśuṣe vājām̐ iyarti gomataḥ |
ayaṁ saptabhya ā varaṁ vi vo made prāndhaṁ śroṇaṁ ca tāriṣad vivakṣase ||