Rig Veda · Chapter 10.022

kuha śruta indraḥ kasminn adya jane mitro na śrūyate |
ṛṣīṇāṁ vā yaḥ kṣaye guhā vā carkṛṣe girā ||

iha śruta indro asme adya stave vajry ṛcīṣamaḥ |
mitro na yo janeṣv ā yaśaś cakre asāmy ā ||

maho yas patiḥ śavaso asāmy ā maho nṛmṇasya tūtujiḥ |
bhartā vajrasya dhṛṣṇoḥ pitā putram iva priyam ||

yujāno aśvā vātasya dhunī devo devasya vajrivaḥ |
syantā pathā virukmatā sṛjānaḥ stoṣy adhvanaḥ ||

tvaṁ tyā cid vātasyāśvāgā ṛjrā tmanā vahadhyai |
yayor devo na martyo yantā nakir vidāyyaḥ ||

adha gmantośanā pṛcchate vāṁ kadarthā na ā gṛham |
ā jagmathuḥ parākād divaś ca gmaś ca martyam ||

ā na indra pṛkṣase 'smākam brahmodyatam |
tat tvā yācāmahe 'vaḥ śuṣṇaṁ yad dhann amānuṣam ||

akarmā dasyur abhi no amantur anyavrato amānuṣaḥ |
tvaṁ tasyāmitrahan vadhar dāsasya dambhaya ||

tvaṁ na indra śūra śūrair uta tvotāso barhaṇā |
purutrā te vi pūrtayo navanta kṣoṇayo yathā ||

tvaṁ tān vṛtrahatye codayo nṝn kārpāṇe śūra vajrivaḥ |
guhā yadī kavīnāṁ viśāṁ nakṣatraśavasām ||

makṣū tā ta indra dānāpnasa ākṣāṇe śūra vajrivaḥ |
yad dha śuṣṇasya dambhayo jātaṁ viśvaṁ sayāvabhiḥ ||

mākudhryag indra śūra vasvīr asme bhūvann abhiṣṭayaḥ |
vayaṁ-vayaṁ ta āsāṁ sumne syāma vajrivaḥ ||

asme tā ta indra santu satyāhiṁsantīr upaspṛśaḥ |
vidyāma yāsām bhujo dhenūnāṁ na vajrivaḥ ||

ahastā yad apadī vardhata kṣāḥ śacībhir vedyānām |
śuṣṇam pari pradakṣiṇid viśvāyave ni śiśnathaḥ ||

pibā-pibed indra śūra somam mā riṣaṇyo vasavāna vasuḥ san |
uta trāyasva gṛṇato maghono mahaś ca rāyo revatas kṛdhī naḥ ||