Rig Veda · Chapter 10.008

pra ketunā bṛhatā yāty agnir ā rodasī vṛṣabho roravīti |
divaś cid antām̐ upamām̐ ud ānaḻ apām upasthe mahiṣo vavardha ||

mumoda garbho vṛṣabhaḥ kakudmān asremā vatsaḥ śimīvām̐ arāvīt |
sa devatāty udyatāni kṛṇvan sveṣu kṣayeṣu prathamo jigāti ||

ā yo mūrdhānam pitror arabdha ny adhvare dadhire sūro arṇaḥ |
asya patmann aruṣīr aśvabudhnā ṛtasya yonau tanvo juṣanta ||

uṣa-uṣo hi vaso agram eṣi tvaṁ yamayor abhavo vibhāvā |
ṛtāya sapta dadhiṣe padāni janayan mitraṁ tanve3 svāyai ||

bhuvaś cakṣur maha ṛtasya gopā bhuvo varuṇo yad ṛtāya veṣi |
bhuvo apāṁ napāj jātavedo bhuvo dūto yasya havyaṁ jujoṣaḥ ||

bhuvo yajñasya rajasaś ca netā yatrā niyudbhiḥ sacase śivābhiḥ |
divi mūrdhānaṁ dadhiṣe svarṣāṁ jihvām agne cakṛṣe havyavāham ||

asya tritaḥ kratunā vavre antar icchan dhītim pitur evaiḥ parasya |
sacasyamānaḥ pitror upasthe jāmi bruvāṇa āyudhāni veti ||

sa pitryāṇy āyudhāni vidvān indreṣita āptyo abhy ayudhyat |
triśīrṣāṇaṁ saptaraśmiṁ jaghanvān tvāṣṭrasya cin niḥ sasṛje trito gāḥ ||

bhūrīd indra udinakṣantam ojo 'vābhinat satpatir manyamānam |
tvāṣṭrasya cid viśvarūpasya gonām ācakrāṇas trīṇi śīrṣā parā vark ||