Rig Veda · Chapter 10.004

pra te yakṣi pra ta iyarmi manma bhuvo yathā vandyo no haveṣu |
dhanvann iva prapā asi tvam agna iyakṣave pūrave pratna rājan ||

yaṁ tvā janāso abhi saṁcaranti gāva uṣṇam iva vrajaṁ yaviṣṭha |
dūto devānām asi martyānām antar mahām̐ś carasi rocanena ||

śiśuṁ na tvā jenyaṁ vardhayantī mātā bibharti sacanasyamānā |
dhanor adhi pravatā yāsi haryañ jigīṣase paśur ivāvasṛṣṭaḥ ||

mūrā amūra na vayaṁ cikitvo mahitvam agne tvam aṅga vitse |
śaye vavriś carati jihvayādan rerihyate yuvatiṁ viśpatiḥ san ||

kūcij jāyate sanayāsu navyo vane tasthau palito dhūmaketuḥ |
asnātāpo vṛṣabho na pra veti sacetaso yam praṇayanta martāḥ ||

tanūtyajeva taskarā vanargū raśanābhir daśabhir abhy adhītām |
iyaṁ te agne navyasī manīṣā yukṣvā rathaṁ na śucayadbhir aṅgaiḥ ||

brahma ca te jātavedo namaś ceyaṁ ca gīḥ sadam id vardhanī bhūt |
rakṣā ṇo agne tanayāni tokā rakṣota nas tanvo3 aprayucchan ||