Rig Veda · Chapter 10.002

piprīhi devām̐ uśato yaviṣṭha vidvām̐ ṛtūm̐r ṛtupate yajeha |
ye daivyā ṛtvijas tebhir agne tvaṁ hotṝṇām asy āyajiṣṭhaḥ ||

veṣi hotram uta potraṁ janānām mandhātāsi draviṇodā ṛtāvā |
svāhā vayaṁ kṛṇavāmā havīṁṣi devo devān yajatv agnir arhan ||

ā devānām api panthām aganma yac chaknavāma tad anu pravoḻhum |
agnir vidvān sa yajāt sed u hotā so adhvarān sa ṛtūn kalpayāti ||

yad vo vayam pramināma vratāni viduṣāṁ devā aviduṣṭarāsaḥ |
agniṣ ṭad viśvam ā pṛṇāti vidvān yebhir devām̐ ṛtubhiḥ kalpayāti ||

yat pākatrā manasā dīnadakṣā na yajñasya manvate martyāsaḥ |
agniṣ ṭad dhotā kratuvid vijānan yajiṣṭho devām̐ ṛtuśo yajāti ||

viśveṣāṁ hy adhvarāṇām anīkaṁ citraṁ ketuṁ janitā tvā jajāna |
sa ā yajasva nṛvatīr anu kṣāḥ spārhā iṣaḥ kṣumatīr viśvajanyāḥ ||

yaṁ tvā dyāvāpṛthivī yaṁ tvāpas tvaṣṭā yaṁ tvā sujanimā jajāna |
panthām anu pravidvān pitṛyāṇaṁ dyumad agne samidhāno vi bhāhi ||