Rig Veda · Chapter 1.178

yad dha syā ta indra śruṣṭir asti yayā babhūtha jaritṛbhya ūtī |
mā naḥ kāmam mahayantam ā dhag viśvā te aśyām pary āpa āyoḥ ||

na ghā rājendra ā dabhan no yā nu svasārā kṛṇavanta yonau |
āpaś cid asmai sutukā aveṣan gaman na indraḥ sakhyā vayaś ca ||

jetā nṛbhir indraḥ pṛtsu śūraḥ śrotā havaṁ nādhamānasya kāroḥ |
prabhartā rathaṁ dāśuṣa upāka udyantā giro yadi ca tmanā bhūt ||

evā nṛbhir indraḥ suśravasyā prakhādaḥ pṛkṣo abhi mitriṇo bhūt |
samarya iṣaḥ stavate vivāci satrākaro yajamānasya śaṁsaḥ ||

tvayā vayam maghavann indra śatrūn abhi ṣyāma mahato manyamānān |
tvaṁ trātā tvam u no vṛdhe bhūr vidyāmeṣaṁ vṛjanaṁ jīradānum ||