Rig Veda · Chapter 1.175

matsy apāyi te mahaḥ pātrasyeva harivo matsaro madaḥ |
vṛṣā te vṛṣṇa indur vājī sahasrasātamaḥ ||

ā nas te gantu matsaro vṛṣā mado vareṇyaḥ |
sahāvām̐ indra sānasiḥ pṛtanāṣāḻ amartyaḥ ||

tvaṁ hi śūraḥ sanitā codayo manuṣo ratham |
sahāvān dasyum avratam oṣaḥ pātraṁ na śociṣā ||

muṣāya sūryaṁ kave cakram īśāna ojasā |
vaha śuṣṇāya vadhaṁ kutsaṁ vātasyāśvaiḥ ||

śuṣmintamo hi te mado dyumnintama uta kratuḥ |
vṛtraghnā varivovidā maṁsīṣṭhā aśvasātamaḥ ||

yathā pūrvebhyo jaritṛbhya indra maya ivāpo na tṛṣyate babhūtha |
tām anu tvā nividaṁ johavīmi vidyāmeṣaṁ vṛjanaṁ jīradānum ||