Rig Veda · Chapter 1.158

vasū rudrā purumantū vṛdhantā daśasyataṁ no vṛṣaṇāv abhiṣṭau |
dasrā ha yad rekṇa aucathyo vām pra yat sasrāthe akavābhir ūtī ||

ko vāṁ dāśat sumataye cid asyai vasū yad dhethe namasā pade goḥ |
jigṛtam asme revatīḥ puraṁdhīḥ kāmapreṇeva manasā carantā ||

yukto ha yad vāṁ taugryāya perur vi madhye arṇaso dhāyi pajraḥ |
upa vām avaḥ śaraṇaṁ gameyaṁ śūro nājma patayadbhir evaiḥ ||

upastutir aucathyam uruṣyen mā mām ime patatriṇī vi dugdhām |
mā mām edho daśatayaś cito dhāk pra yad vām baddhas tmani khādati kṣām ||

na mā garan nadyo mātṛtamā dāsā yad īṁ susamubdham avādhuḥ |
śiro yad asya traitano vitakṣat svayaṁ dāsa uro aṁsāv api gdha ||

dīrghatamā māmateyo jujurvān daśame yuge |
apām arthaṁ yatīnām brahmā bhavati sārathiḥ ||