Rig Veda · Chapter 1.152

yuvaṁ vastrāṇi pīvasā vasāthe yuvor acchidrā mantavo ha sargāḥ |
avātiratam anṛtāni viśva ṛtena mitrāvaruṇā sacethe ||

etac cana tvo vi ciketad eṣāṁ satyo mantraḥ kaviśasta ṛghāvān |
triraśriṁ hanti caturaśrir ugro devanido ha prathamā ajūryan ||

apād eti prathamā padvatīnāṁ kas tad vām mitrāvaruṇā ciketa |
garbho bhāram bharaty ā cid asya ṛtam piparty anṛtaṁ ni tārīt ||

prayantam it pari jāraṁ kanīnām paśyāmasi nopanipadyamānam |
anavapṛgṇā vitatā vasānam priyam mitrasya varuṇasya dhāma ||

anaśvo jāto anabhīśur arvā kanikradat patayad ūrdhvasānuḥ |
acittam brahma jujuṣur yuvānaḥ pra mitre dhāma varuṇe gṛṇantaḥ ||

ā dhenavo māmateyam avantīr brahmapriyam pīpayan sasminn ūdhan |
pitvo bhikṣeta vayunāni vidvān āsāvivāsann aditim uruṣyet ||

ā vām mitrāvaruṇā havyajuṣṭiṁ namasā devāv avasā vavṛtyām |
asmākam brahma pṛtanāsu sahyā asmākaṁ vṛṣṭir divyā supārā ||