Rig Veda · Chapter 1.133

ubhe punāmi rodasī ṛtena druho dahāmi sam mahīr anindrāḥ |
abhivlagya yatra hatā amitrā vailasthānam pari tṛḻhā aśeran ||

abhivlagyā cid adrivaḥ śīrṣā yātumatīnām |
chindhi vaṭūriṇā padā mahāvaṭūriṇā padā ||

avāsām maghavañ jahi śardho yātumatīnām |
vailasthānake armake mahāvailasthe armake ||

yāsāṁ tisraḥ pañcāśato 'bhivlaṅgair apāvapaḥ |
tat su te manāyati takat su te manāyati ||

piśaṅgabhṛṣṭim ambhṛṇam piśācim indra sam mṛṇa |
sarvaṁ rakṣo ni barhaya ||

avar maha indra dādṛhi śrudhī naḥ śuśoca hi dyauḥ kṣā na bhīṣām̐ adrivo ghṛṇān na bhīṣām̐ adrivaḥ |
śuṣmintamo hi śuṣmibhir vadhair ugrebhir īyase |
apūruṣaghno apratīta śūra satvabhis trisaptaiḥ śūra satvabhiḥ ||

vanoti hi sunvan kṣayam parīṇasaḥ sunvāno hi ṣmā yajaty ava dviṣo devānām ava dviṣaḥ |
sunvāna it siṣāsati sahasrā vājy avṛtaḥ |
sunvānāyendro dadāty ābhuvaṁ rayiṁ dadāty ābhuvam ||