Rig Veda · Chapter 1.122

pra vaḥ pāntaṁ raghumanyavo 'ndho yajñaṁ rudrāya mīḻhuṣe bharadhvam |
divo astoṣy asurasya vīrair iṣudhyeva maruto rodasyoḥ ||

patnīva pūrvahūtiṁ vāvṛdhadhyā uṣāsānaktā purudhā vidāne |
starīr nātkaṁ vyutaṁ vasānā sūryasya śriyā sudṛśī hiraṇyaiḥ ||

mamattu naḥ parijmā vasarhā mamattu vāto apāṁ vṛṣaṇvān |
śiśītam indrāparvatā yuvaṁ nas tan no viśve varivasyantu devāḥ ||

uta tyā me yaśasā śvetanāyai vyantā pāntauśijo huvadhyai |
pra vo napātam apāṁ kṛṇudhvam pra mātarā rāspinasyāyoḥ ||

ā vo ruvaṇyum auśijo huvadhyai ghoṣeva śaṁsam arjunasya naṁśe |
pra vaḥ pūṣṇe dāvana ām̐ acchā voceya vasutātim agneḥ ||

śrutam me mitrāvaruṇā havemota śrutaṁ sadane viśvataḥ sīm |
śrotu naḥ śroturātiḥ suśrotuḥ sukṣetrā sindhur adbhiḥ ||

stuṣe sā vāṁ varuṇa mitra rātir gavāṁ śatā pṛkṣayāmeṣu pajre |
śrutarathe priyarathe dadhānāḥ sadyaḥ puṣṭiṁ nirundhānāso agman ||

asya stuṣe mahimaghasya rādhaḥ sacā sanema nahuṣaḥ suvīrāḥ |
jano yaḥ pajrebhyo vājinīvān aśvāvato rathino mahyaṁ sūriḥ ||

jano yo mitrāvaruṇāv abhidhrug apo na vāṁ sunoty akṣṇayādhruk |
svayaṁ sa yakṣmaṁ hṛdaye ni dhatta āpa yad īṁ hotrābhir ṛtāvā ||

sa vrādhato nahuṣo daṁsujūtaḥ śardhastaro narāṁ gūrtaśravāḥ |
visṛṣṭarātir yāti bāḻhasṛtvā viśvāsu pṛtsu sadam ic chūraḥ ||

adha gmantā nahuṣo havaṁ sūreḥ śrotā rājāno amṛtasya mandrāḥ |
nabhojuvo yan niravasya rādhaḥ praśastaye mahinā rathavate ||

etaṁ śardhaṁ dhāma yasya sūrer ity avocan daśatayasya naṁśe |
dyumnāni yeṣu vasutātī rāran viśve sanvantu prabhṛtheṣu vājam ||

mandāmahe daśatayasya dhāser dvir yat pañca bibhrato yanty annā |
kim iṣṭāśva iṣṭaraśmir eta īśānāsas taruṣa ṛñjate nṝn ||

hiraṇyakarṇam maṇigrīvam arṇas tan no viśve varivasyantu devāḥ |
aryo giraḥ sadya ā jagmuṣīr osrāś cākantūbhayeṣv asme ||

catvāro mā maśarśārasya śiśvas trayo rājña āyavasasya jiṣṇoḥ |
ratho vām mitrāvaruṇā dīrghāpsāḥ syūmagabhastiḥ sūro nādyaut ||