Rig Veda · Chapter 1.116

nāsatyābhyām barhir iva pra vṛñje stomām̐ iyarmy abhriyeva vātaḥ |
yāv arbhagāya vimadāya jāyāṁ senājuvā nyūhatū rathena ||

vīḻupatmabhir āśuhemabhir vā devānāṁ vā jūtibhiḥ śāśadānā |
tad rāsabho nāsatyā sahasram ājā yamasya pradhane jigāya ||

tugro ha bhujyum aśvinodameghe rayiṁ na kaś cin mamṛvām̐ avāhāḥ |
tam ūhathur naubhir ātmanvatībhir antarikṣaprudbhir apodakābhiḥ ||

tisraḥ kṣapas trir ahātivrajadbhir nāsatyā bhujyum ūhathuḥ pataṁgaiḥ |
samudrasya dhanvann ārdrasya pāre tribhī rathaiḥ śatapadbhiḥ ṣaḻaśvaiḥ ||

anārambhaṇe tad avīrayethām anāsthāne agrabhaṇe samudre |
yad aśvinā ūhathur bhujyum astaṁ śatāritrāṁ nāvam ātasthivāṁsam ||

yam aśvinā dadathuḥ śvetam aśvam aghāśvāya śaśvad it svasti |
tad vāṁ dātram mahi kīrtenyam bhūt paidvo vājī sadam id dhavyo aryaḥ ||

yuvaṁ narā stuvate pajriyāya kakṣīvate aradatam puraṁdhim |
kārotarāc chaphād aśvasya vṛṣṇaḥ śataṁ kumbhām̐ asiñcataṁ surāyāḥ ||

himenāgniṁ ghraṁsam avārayethām pitumatīm ūrjam asmā adhattam |
ṛbīse atrim aśvināvanītam un ninyathuḥ sarvagaṇaṁ svasti ||

parāvataṁ nāsatyānudethām uccābudhnaṁ cakrathur jihmabāram |
kṣarann āpo na pāyanāya rāye sahasrāya tṛṣyate gotamasya ||

jujuruṣo nāsatyota vavrim prāmuñcataṁ drāpim iva cyavānāt |
prātirataṁ jahitasyāyur dasrād it patim akṛṇutaṁ kanīnām ||

tad vāṁ narā śaṁsyaṁ rādhyaṁ cābhiṣṭiman nāsatyā varūtham |
yad vidvāṁsā nidhim ivāpagūḻham ud darśatād ūpathur vandanāya ||

tad vāṁ narā sanaye daṁsa ugram āviṣ kṛṇomi tanyatur na vṛṣṭim |
dadhyaṅ ha yan madhv ātharvaṇo vām aśvasya śīrṣṇā pra yad īm uvāca ||

ajohavīn nāsatyā karā vām mahe yāman purubhujā puraṁdhiḥ |
śrutaṁ tac chāsur iva vadhrimatyā hiraṇyahastam aśvināv adattam ||

āsno vṛkasya vartikām abhīke yuvaṁ narā nāsatyāmumuktam |
uto kavim purubhujā yuvaṁ ha kṛpamāṇam akṛṇutaṁ vicakṣe ||

caritraṁ hi ver ivācchedi parṇam ājā khelasya paritakmyāyām |
sadyo jaṅghām āyasīṁ viśpalāyai dhane hite sartave praty adhattam ||

śatam meṣān vṛkye cakṣadānam ṛjrāśvaṁ tam pitāndhaṁ cakāra |
tasmā akṣī nāsatyā vicakṣa ādhattaṁ dasrā bhiṣajāv anarvan ||

ā vāṁ rathaṁ duhitā sūryasya kārṣmevātiṣṭhad arvatā jayantī |
viśve devā anv amanyanta hṛdbhiḥ sam u śriyā nāsatyā sacethe ||

yad ayātaṁ divodāsāya vartir bharadvājāyāśvinā hayantā |
revad uvāha sacano ratho vāṁ vṛṣabhaś ca śiṁśumāraś ca yuktā ||

rayiṁ sukṣatraṁ svapatyam āyuḥ suvīryaṁ nāsatyā vahantā |
ā jahnāvīṁ samanasopa vājais trir ahno bhāgaṁ dadhatīm ayātam ||

pariviṣṭaṁ jāhuṣaṁ viśvataḥ sīṁ sugebhir naktam ūhathū rajobhiḥ |
vibhindunā nāsatyā rathena vi parvatām̐ ajarayū ayātam ||

ekasyā vastor āvataṁ raṇāya vaśam aśvinā sanaye sahasrā |
nir ahataṁ ducchunā indravantā pṛthuśravaso vṛṣaṇāv arātīḥ ||

śarasya cid ārcatkasyāvatād ā nīcād uccā cakrathuḥ pātave vāḥ |
śayave cin nāsatyā śacībhir jasuraye staryam pipyathur gām ||

avasyate stuvate kṛṣṇiyāya ṛjūyate nāsatyā śacībhiḥ |
paśuṁ na naṣṭam iva darśanāya viṣṇāpvaṁ dadathur viśvakāya ||

daśa rātrīr aśivenā nava dyūn avanaddhaṁ śnathitam apsv a1ntaḥ |
viprutaṁ rebham udani pravṛktam un ninyathuḥ somam iva sruveṇa ||

pra vāṁ daṁsāṁsy aśvināv avocam asya patiḥ syāṁ sugavaḥ suvīraḥ |
uta paśyann aśnuvan dīrgham āyur astam ivej jarimāṇaṁ jagamyām ||