Rig Veda · Chapter 1.109

vi hy akhyam manasā vasya icchann indrāgnī jñāsa uta vā sajātān |
nānyā yuvat pramatir asti mahyaṁ sa vāṁ dhiyaṁ vājayantīm atakṣam ||

aśravaṁ hi bhūridāvattarā vāṁ vijāmātur uta vā ghā syālāt |
athā somasya prayatī yuvabhyām indrāgnī stomaṁ janayāmi navyam ||

mā cchedma raśmīm̐r iti nādhamānāḥ pitṝṇāṁ śaktīr anuyacchamānāḥ |
indrāgnibhyāṁ kaṁ vṛṣaṇo madanti tā hy adrī dhiṣaṇāyā upasthe ||

yuvābhyāṁ devī dhiṣaṇā madāyendrāgnī somam uśatī sunoti |
tāv aśvinā bhadrahastā supāṇī ā dhāvatam madhunā pṛṅktam apsu ||

yuvām indrāgnī vasuno vibhāge tavastamā śuśrava vṛtrahatye |
tāv āsadyā barhiṣi yajñe asmin pra carṣaṇī mādayethāṁ sutasya ||

pra carṣaṇibhyaḥ pṛtanāhaveṣu pra pṛthivyā riricāthe divaś ca |
pra sindhubhyaḥ pra giribhyo mahitvā prendrāgnī viśvā bhuvanāty anyā ||

ā bharataṁ śikṣataṁ vajrabāhū asmām̐ indrāgnī avataṁ śacībhiḥ |
ime nu te raśmayaḥ sūryasya yebhiḥ sapitvam pitaro na āsan ||

puraṁdarā śikṣataṁ vajrahastāsmām̐ indrāgnī avatam bhareṣu |
tan no mitro varuṇo māmahantām aditiḥ sindhuḥ pṛthivī uta dyauḥ ||