Rig Veda · Chapter 1.105

candramā apsv a1ntar ā suparṇo dhāvate divi |
na vo hiraṇyanemayaḥ padaṁ vindanti vidyuto vittam me asya rodasī ||

artham id vā u arthina ā jāyā yuvate patim |
tuñjāte vṛṣṇyam payaḥ paridāya rasaṁ duhe vittam me asya rodasī ||

mo ṣu devā adaḥ sva1r ava pādi divas pari |
mā somyasya śambhuvaḥ śūne bhūma kadā cana vittam me asya rodasī ||

yajñam pṛcchāmy avamaṁ sa tad dūto vi vocati |
kva ṛtam pūrvyaṁ gataṁ kas tad bibharti nūtano vittam me asya rodasī ||

amī ye devāḥ sthana triṣv ā rocane divaḥ |
kad va ṛtaṁ kad anṛtaṁ kva pratnā va āhutir vittam me asya rodasī ||

kad va ṛtasya dharṇasi kad varuṇasya cakṣaṇam |
kad aryamṇo mahas pathāti krāmema dūḍhyo vittam me asya rodasī ||

ahaṁ so asmi yaḥ purā sute vadāmi kāni cit |
tam mā vyanty ādhyo3 vṛko na tṛṣṇajam mṛgaṁ vittam me asya rodasī ||

sam mā tapanty abhitaḥ sapatnīr iva parśavaḥ |
mūṣo na śiśnā vy adanti mādhyaḥ stotāraṁ te śatakrato vittam me asya rodasī ||

amī ye sapta raśmayas tatrā me nābhir ātatā |
tritas tad vedāptyaḥ sa jāmitvāya rebhati vittam me asya rodasī ||

amī ye pañcokṣaṇo madhye tasthur maho divaḥ |
devatrā nu pravācyaṁ sadhrīcīnā ni vāvṛtur vittam me asya rodasī ||

suparṇā eta āsate madhya ārodhane divaḥ |
te sedhanti patho vṛkaṁ tarantaṁ yahvatīr apo vittam me asya rodasī ||

navyaṁ tad ukthyaṁ hitaṁ devāsaḥ supravācanam |
ṛtam arṣanti sindhavaḥ satyaṁ tātāna sūryo vittam me asya rodasī ||

agne tava tyad ukthyaṁ deveṣv asty āpyam |
sa naḥ satto manuṣvad ā devān yakṣi viduṣṭaro vittam me asya rodasī ||

satto hotā manuṣvad ā devām̐ acchā viduṣṭaraḥ |
agnir havyā suṣūdati devo deveṣu medhiro vittam me asya rodasī ||

brahmā kṛṇoti varuṇo gātuvidaṁ tam īmahe |
vy ūrṇoti hṛdā matiṁ navyo jāyatām ṛtaṁ vittam me asya rodasī ||

asau yaḥ panthā ādityo divi pravācyaṁ kṛtaḥ |
na sa devā atikrame tam martāso na paśyatha vittam me asya rodasī ||

tritaḥ kūpe 'vahito devān havata ūtaye |
tac chuśrāva bṛhaspatiḥ kṛṇvann aṁhūraṇād uru vittam me asya rodasī ||

aruṇo mā sakṛd vṛkaḥ pathā yantaṁ dadarśa hi |
uj jihīte nicāyyā taṣṭeva pṛṣṭyāmayī vittam me asya rodasī ||

enāṅgūṣeṇa vayam indravanto 'bhi ṣyāma vṛjane sarvavīrāḥ |
tan no mitro varuṇo māmahantām aditiḥ sindhuḥ pṛthivī uta dyauḥ ||