Rig Veda · Chapter 1.093

agnīṣomāv imaṁ su me śṛṇutaṁ vṛṣaṇā havam |
prati sūktāni haryatam bhavataṁ dāśuṣe mayaḥ ||

agnīṣomā yo adya vām idaṁ vacaḥ saparyati |
tasmai dhattaṁ suvīryaṁ gavām poṣaṁ svaśvyam ||

agnīṣomā ya āhutiṁ yo vāṁ dāśād dhaviṣkṛtim |
sa prajayā suvīryaṁ viśvam āyur vy aśnavat ||

agnīṣomā ceti tad vīryaṁ vāṁ yad amuṣṇītam avasam paṇiṁ gāḥ |
avātiratam bṛsayasya śeṣo 'vindataṁ jyotir ekam bahubhyaḥ ||

yuvam etāni divi rocanāny agniś ca soma sakratū adhattam |
yuvaṁ sindhūm̐r abhiśaster avadyād agnīṣomāv amuñcataṁ gṛbhītān ||

ānyaṁ divo mātariśvā jabhārāmathnād anyam pari śyeno adreḥ |
agnīṣomā brahmaṇā vāvṛdhānoruṁ yajñāya cakrathur u lokam ||

agnīṣomā haviṣaḥ prasthitasya vītaṁ haryataṁ vṛṣaṇā juṣethām |
suśarmāṇā svavasā hi bhūtam athā dhattaṁ yajamānāya śaṁ yoḥ ||

yo agnīṣomā haviṣā saparyād devadrīcā manasā yo ghṛtena |
tasya vrataṁ rakṣatam pātam aṁhaso viśe janāya mahi śarma yacchatam ||

agnīṣomā savedasā sahūtī vanataṁ giraḥ |
saṁ devatrā babhūvathuḥ ||

agnīṣomāv anena vāṁ yo vāṁ ghṛtena dāśati |
tasmai dīdayatam bṛhat ||

agnīṣomāv imāni no yuvaṁ havyā jujoṣatam |
ā yātam upa naḥ sacā ||

agnīṣomā pipṛtam arvato na ā pyāyantām usriyā havyasūdaḥ |
asme balāni maghavatsu dhattaṁ kṛṇutaṁ no adhvaraṁ śruṣṭimantam ||