Rig Veda · Chapter 1.074

upaprayanto adhvaram mantraṁ vocemāgnaye |
āre asme ca śṛṇvate ||

yaḥ snīhitīṣu pūrvyaḥ saṁjagmānāsu kṛṣṭiṣu |
arakṣad dāśuṣe gayam ||

uta bruvantu jantava ud agnir vṛtrahājani |
dhanaṁjayo raṇe-raṇe ||

yasya dūto asi kṣaye veṣi havyāni vītaye |
dasmat kṛṇoṣy adhvaram ||

tam it suhavyam aṅgiraḥ sudevaṁ sahaso yaho |
janā āhuḥ subarhiṣam ||

ā ca vahāsi tām̐ iha devām̐ upa praśastaye |
havyā suścandra vītaye ||

na yor upabdir aśvyaḥ śṛṇve rathasya kac cana |
yad agne yāsi dūtyam ||

tvoto vājy ahrayo 'bhi pūrvasmād aparaḥ |
pra dāśvām̐ agne asthāt ||

uta dyumat suvīryam bṛhad agne vivāsasi |
devebhyo deva dāśuṣe ||