Rig Veda · Chapter 1.072

ni kāvyā vedhasaḥ śaśvatas kar haste dadhāno naryā purūṇi |
agnir bhuvad rayipatī rayīṇāṁ satrā cakrāṇo amṛtāni viśvā ||

asme vatsam pari ṣantaṁ na vindann icchanto viśve amṛtā amūrāḥ |
śramayuvaḥ padavyo dhiyaṁdhās tasthuḥ pade parame cārv agneḥ ||

tisro yad agne śaradas tvām ic chuciṁ ghṛtena śucayaḥ saparyān |
nāmāni cid dadhire yajñiyāny asūdayanta tanva1ḥ sujātāḥ ||

ā rodasī bṛhatī vevidānāḥ pra rudriyā jabhrire yajñiyāsaḥ |
vidan marto nemadhitā cikitvān agnim pade parame tasthivāṁsam ||

saṁjānānā upa sīdann abhijñu patnīvanto namasyaṁ namasyan |
ririkvāṁsas tanvaḥ kṛṇvata svāḥ sakhā sakhyur nimiṣi rakṣamāṇāḥ ||

triḥ sapta yad guhyāni tve it padāvidan nihitā yajñiyāsaḥ |
tebhī rakṣante amṛtaṁ sajoṣāḥ paśūñ ca sthātṝñ carathaṁ ca pāhi ||

vidvām̐ agne vayunāni kṣitīnāṁ vy ānuṣak churudho jīvase dhāḥ |
antarvidvām̐ adhvano devayānān atandro dūto abhavo havirvāṭ ||

svādhyo diva ā sapta yahvī rāyo duro vy ṛtajñā ajānan |
vidad gavyaṁ saramā dṛḻham ūrvaṁ yenā nu kam mānuṣī bhojate viṭ ||

ā ye viśvā svapatyāni tasthuḥ kṛṇvānāso amṛtatvāya gātum |
mahnā mahadbhiḥ pṛthivī vi tasthe mātā putrair aditir dhāyase veḥ ||

adhi śriyaṁ ni dadhuś cārum asmin divo yad akṣī amṛtā akṛṇvan |
adha kṣaranti sindhavo na sṛṣṭāḥ pra nīcīr agne aruṣīr ajānan ||