Rig Veda · Chapter 1.055

divaś cid asya varimā vi papratha indraṁ na mahnā pṛthivī cana prati |
bhīmas tuviṣmāñ carṣaṇibhya ātapaḥ śiśīte vajraṁ tejase na vaṁsagaḥ ||

so arṇavo na nadyaḥ samudriyaḥ prati gṛbhṇāti viśritā varīmabhiḥ |
indraḥ somasya pītaye vṛṣāyate sanāt sa yudhma ojasā panasyate ||

tvaṁ tam indra parvataṁ na bhojase maho nṛmṇasya dharmaṇām irajyasi |
pra vīryeṇa devatāti cekite viśvasmā ugraḥ karmaṇe purohitaḥ ||

sa id vane namasyubhir vacasyate cāru janeṣu prabruvāṇa indriyam |
vṛṣā chandur bhavati haryato vṛṣā kṣemeṇa dhenām maghavā yad invati ||

sa in mahāni samithāni majmanā kṛṇoti yudhma ojasā janebhyaḥ |
adhā cana śrad dadhati tviṣīmata indrāya vajraṁ nighanighnate vadham ||

sa hi śravasyuḥ sadanāni kṛtrimā kṣmayā vṛdhāna ojasā vināśayan |
jyotīṁṣi kṛṇvann avṛkāṇi yajyave 'va sukratuḥ sartavā apaḥ sṛjat ||

dānāya manaḥ somapāvann astu te 'rvāñcā harī vandanaśrud ā kṛdhi |
yamiṣṭhāsaḥ sārathayo ya indra te na tvā ketā ā dabhnuvanti bhūrṇayaḥ ||

aprakṣitaṁ vasu bibharṣi hastayor aṣāḻhaṁ sahas tanvi śruto dadhe |
āvṛtāso 'vatāso na kartṛbhis tanūṣu te kratava indra bhūrayaḥ ||