Rig Veda · Chapter 1.050

ud u tyaṁ jātavedasaṁ devaṁ vahanti ketavaḥ |
dṛśe viśvāya sūryam ||

apa tye tāyavo yathā nakṣatrā yanty aktubhiḥ |
sūrāya viśvacakṣase ||

adṛśram asya ketavo vi raśmayo janām̐ anu |
bhrājanto agnayo yathā ||

taraṇir viśvadarśato jyotiṣkṛd asi sūrya |
viśvam ā bhāsi rocanam ||

pratyaṅ devānāṁ viśaḥ pratyaṅṅ ud eṣi mānuṣān |
pratyaṅ viśvaṁ svar dṛśe ||

yenā pāvaka cakṣasā bhuraṇyantaṁ janām̐ anu |
tvaṁ varuṇa paśyasi ||

vi dyām eṣi rajas pṛthv ahā mimāno aktubhiḥ |
paśyañ janmāni sūrya ||

sapta tvā harito rathe vahanti deva sūrya |
śociṣkeśaṁ vicakṣaṇa ||

ayukta sapta śundhyuvaḥ sūro rathasya naptyaḥ |
tābhir yāti svayuktibhiḥ ||

ud vayaṁ tamasas pari jyotiṣ paśyanta uttaram |
devaṁ devatrā sūryam aganma jyotir uttamam ||

udyann adya mitramaha ārohann uttarāṁ divam |
hṛdrogam mama sūrya harimāṇaṁ ca nāśaya ||

śukeṣu me harimāṇaṁ ropaṇākāsu dadhmasi |
atho hāridraveṣu me harimāṇaṁ ni dadhmasi ||

ud agād ayam ādityo viśvena sahasā saha |
dviṣantam mahyaṁ randhayan mo ahaṁ dviṣate radham ||