Rig Veda · Chapter 1.038

kad dha nūnaṁ kadhapriyaḥ pitā putraṁ na hastayoḥ |
dadhidhve vṛktabarhiṣaḥ ||

kva nūnaṁ kad vo arthaṁ gantā divo na pṛthivyāḥ |
kva vo gāvo na raṇyanti ||

kva vaḥ sumnā navyāṁsi marutaḥ kva suvitā |
kvo3 viśvāni saubhagā ||

yad yūyam pṛśnimātaro martāsaḥ syātana |
stotā vo amṛtaḥ syāt ||

mā vo mṛgo na yavase jaritā bhūd ajoṣyaḥ |
pathā yamasya gād upa ||

mo ṣu ṇaḥ parā-parā nirṛtir durhaṇā vadhīt |
padīṣṭa tṛṣṇayā saha ||

satyaṁ tveṣā amavanto dhanvañ cid ā rudriyāsaḥ |
mihaṁ kṛṇvanty avātām ||

vāśreva vidyun mimāti vatsaṁ na mātā siṣakti |
yad eṣāṁ vṛṣṭir asarji ||

divā cit tamaḥ kṛṇvanti parjanyenodavāhena |
yat pṛthivīṁ vyundanti ||

adha svanān marutāṁ viśvam ā sadma pārthivam |
arejanta pra mānuṣāḥ ||

maruto vīḻupāṇibhiś citrā rodhasvatīr anu |
yātem akhidrayāmabhiḥ ||

sthirā vaḥ santu nemayo rathā aśvāsa eṣām |
susaṁskṛtā abhīśavaḥ ||

acchā vadā tanā girā jarāyai brahmaṇas patim |
agnim mitraṁ na darśatam ||

mimīhi ślokam āsye parjanya iva tatanaḥ |
gāya gāyatram ukthyam ||

vandasva mārutaṁ gaṇaṁ tveṣam panasyum arkiṇam |
asme vṛddhā asann iha ||