Rig Veda · Chapter 1.025

yac cid dhi te viśo yathā pra deva varuṇa vratam |
minīmasi dyavi-dyavi ||

mā no vadhāya hatnave jihīḻānasya rīradhaḥ |
mā hṛṇānasya manyave ||

vi mṛḻīkāya te mano rathīr aśvaṁ na saṁditam |
gīrbhir varuṇa sīmahi ||

parā hi me vimanyavaḥ patanti vasyaïṣṭaye |
vayo na vasatīr upa ||

kadā kṣatraśriyaṁ naram ā varuṇaṁ karāmahe |
mṛḻīkāyorucakṣasam ||

tad it samānam āśāte venantā na pra yucchataḥ |
dhṛtavratāya dāśuṣe ||

vedā yo vīnām padam antarikṣeṇa patatām |
veda nāvaḥ samudriyaḥ ||

veda māso dhṛtavrato dvādaśa prajāvataḥ |
vedā ya upajāyate ||

veda vātasya vartanim uror ṛṣvasya bṛhataḥ |
vedā ye adhyāsate ||

ni ṣasāda dhṛtavrato varuṇaḥ pastyā3sv ā |
sāmrājyāya sukratuḥ ||

ato viśvāny adbhutā cikitvām̐ abhi paśyati |
kṛtāni yā ca kartvā ||

sa no viśvāhā sukratur ādityaḥ supathā karat |
pra ṇa āyūṁṣi tāriṣat ||

bibhrad drāpiṁ hiraṇyayaṁ varuṇo vasta nirṇijam |
pari spaśo ni ṣedire ||

na yaṁ dipsanti dipsavo na druhvāṇo janānām |
na devam abhimātayaḥ ||

uta yo mānuṣeṣv ā yaśaś cakre asāmy ā |
asmākam udareṣv ā ||

parā me yanti dhītayo gāvo na gavyūtīr anu |
icchantīr urucakṣasam ||

saṁ nu vocāvahai punar yato me madhv ābhṛtam |
hoteva kṣadase priyam ||

darśaṁ nu viśvadarśataṁ darśaṁ ratham adhi kṣami |
etā juṣata me giraḥ ||

imam me varuṇa śrudhī havam adyā ca mṛḻaya |
tvām avasyur ā cake ||

tvaṁ viśvasya medhira divaś ca gmaś ca rājasi |
sa yāmani prati śrudhi ||

ud uttamam mumugdhi no vi pāśam madhyamaṁ cṛta |
avādhamāni jīvase ||