Revākhāṇḍa (revised text) · Chapter 88
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe ṛṇatrayamocanatīrthamāhātmyavarṇanaṃ nāma saptāśītitamo 'dhyāyaḥ ||
RKV adhyāya 88
śrīmārkaṇḍeya uvāca:
tasyaivānantaraṃ pārtha kāpilaṃ tīrtham āśrayet /
sthāpitaṃ kapilenaiva sarvapātakanāśanam
aṣṭamyāṃ ca site pakṣe caturdaśyāṃ nareśvara /
snāpayetparayā bhaktyā kapilākṣīrasarpiṣā
śrīkhaṇḍena sugandhena guṇṭhayeta maheśvaram /
tataḥ sugandhapuṣpaiśca śvetaiśca nṛpasattama
ye 'rcayanti jitakrodhā na te yānti yamālayam /
asipattravanaṃ ghoraṃ yamaculhī sudāruṇā
dṛśyate naiva vidvadbhiḥ kapileśvarapūjanāt /
snātvā revājale puṇye bhojayed brāhmaṇāñchubhān
gopradānena vastreṇa tiladānena bhārata /
chatraśayyāpradānena rājā bhavati dhārmikaḥ
tīvratejā vighoraś ca jīvatputraḥ priyaṃvadaḥ /
śatruvargo na tasya syāt kadācit pāṇḍunandana
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0