Revākhāṇḍa (revised text) · Chapter 80

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe dadhiskandamadhuskandatīrthamāhātmyavarṇanaṃ nāmaikonāśītitamo 'dhyāyaḥ ||
RKV adhyāya 80
śrīmārkaṇḍeya uvāca:
tato gacchettu rājendra nandikeśvaramuttamam /
yatra siddho mahānandī tatte sarvaṃ vadāmyaham

revāyāṃ purataḥ kṛtvā purā nandī gaṇeśvaraḥ /
tapastapañjayaṃ kurvaṃstīrthāttīrthaṃ jagāma ha

dadhiskandaṃ madhuskandaṃ yāvattyaktvā tu gacchati /
tāvattuṣṭo mahādevo nandināthamuvāca ha

īśvara uvāca:
bhobhoḥ prasanno nandīśa varaṃ vṛṇu yathepsitam /
tapasā tena tuṣṭo 'haṃ tīrthayātrākṛtena te

nandīśvara uvāca:
na cāhaṃ kāmaye vittaṃ na cāhaṃ kulasantatim /
muktvā na kāmaye kāmaṃ tava pādāmbujātparam

kṛmikīṭapataṅgeṣu tiryagyoniṃ gatasya vā /
janma janmāntare 'pyastu bhaktistvayi mamācalā

tathetyuktvā mahādevaḥ parayā kṛpayā nṛpa /
gṛhītvā taṃ kare siddhaṃ jagāma nilayaṃ haraḥ

tasmiṃstīrthe tu yaḥ snātvā bhaktyā tryakṣaṃ prapūjayet /
agniṣṭomasya yajñasya phalaṃ prāpnoti mānavaḥ

tatra tīrthe tu yaḥ snātvā prāṇatyāgaṃ karoti cet /
śivasyānucaro bhūtvā modate kalpamakṣayam

tataḥ kālena mahatā jāyate vimale kule /
vedavedāṅgatattvajño jīvecca śaradāṃ śatam

etatte kathitaṃ tāta tīrthamāhātmyamuttamam /
durlabhaṃ martyasaṃjñasya sarvapāpakṣayaṃkaram