Revākhāṇḍa (revised text) · Chapter 76

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe śaṅkhacūḍatīrthamāhātmyavarṇanaṃ nāma pañcasaptatitamo 'dhyāyaḥ ||
RKV adhyāya 76
śrīmārkaṇḍeya uvāca:
tato gacchettu rājendra pāreśvaram anuttamam /
parāśaro mahātmā vai narmadāyāstaṭe śubhe

tapaścacāra vipulaṃ putrārthaṃ pāṇḍunandana /
himavadduhitā tena gaurī nārāyaṇī nṛpa

toṣitā parayā bhaktyā narmadottarake taṭe /
tasya tuṣṭā mahādevī śaṅkarārdhāṅgadhāriṇī

bhobho ṛṣivara śreṣṭha tuṣṭāhaṃ tava bhaktitaḥ /
varaṃ yācaya me vipra parāśara mahāmate

parāśara uvāca:
parituṣṭāsi me devi yadi deyo varo mama /
dehi putraṃ bhagavati satyaśaucaguṇānvitam

vedābhyasanaśīlaṃ hi sarvaśāstraviśāradam /
tīrthe cātra bhaved devi sannidhānavareṇa tu

lokopakārahetośca sthīyatāṃ girinandini /
parāśarābhidhānena narmadādakṣiṇe taṭe

śrīdevyuvāca:
evaṃ bhavatu te vipra tatraivāntaradhīyata /
parāśaro mahātmā vai sthāpayāmāsa pārvatīm

śaṅkaraṃ sthāpayāmāsa surāsuranamaskṛtam /
acchedyam apratarkyaṃ ca devānāṃ tu durāsadam

parāśaro mahātmā vai kṛtārtho hyabhavan nṛpa

tatra tīrthe tu yo bhaktyā śuciḥ prayatamānasaḥ /
stryathavā puruṣo vāpi kāmakrodhavivarjitaḥ

māghe caitre 'tha vaiśākhe śrāvaṇe nṛpanandana /
māsi mārgaśire caiva śuklapakṣe tu sarvadā

tatra gatvā śubhe sthāne narmadādakṣiṇe taṭe

upoṣya parayā bhaktyā vratam etat samācaret /
rātrau jāgaraṇaṃ kṛtvā dīpadānaṃ svaśaktitaḥ

gītaṃ nṛtyaṃ tathā vādyaṃ kāmakrodhavivarjitaḥ /
prabhāte vimale prāpte dvijāḥ pūjyāḥ svaśaktitaḥ

sampūjya brāhmaṇān pārtha dhanadānahiraṇyataḥ /
vastreṇa chatradānena śayyātāmbūlabhojanaiḥ

prīṇayennarmadātīre brāhmaṇāñchaṃsitavratān /
śrāddhaṃ kāryaṃ nṛpaśreṣṭha āmaiḥ pakvairjalena ca

strīṇāṃ caiva tu śūdrāṇām āmaśrāddhaṃ praśasyate /
āmaṃ caturguṇaṃ deyaṃ brāhmaṇānāṃ yudhiṣṭhira

vedoktena vidhānena dvijāḥ pūjyāḥ prayatnataḥ /
hastamātraiḥ kuśaiścaiva tilaiścaivākṣatairnṛpa

viprā udaṅmukhāḥ kāryāḥ svayaṃ vai dakṣiṇāmukhaḥ /
darbheṣu nikṣipedannamityuccārya dvijāgrataḥ

pretā yāntu pare loke tīrthasyāsya prabhāvataḥ /
pāpaṃ me praśamaṃ yātu etu vṛddhiṃ śubhaṃ sadā

vṛddhiṃ yātu sadā vaṃśo jñātivargo dvijottama /
evamuccārya viprāya dānaṃ deyaṃ svaśaktitaḥ

gobhūtisahiraṇyādi cānnaṃ vastraṃ svaśaktitaḥ /
dātavyaṃ pāṇḍavaśreṣṭha pāreśvaravarāśrame

ye śṛṇvanti paraṃ bhaktyā mucyante sarvapātakaiḥ