Revākhāṇḍa (revised text) · Chapter 73

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe maṇināgeśvaratīrthamāhātmyavarṇanaṃ nāma dvisaptatitamo 'dhyāyaḥ ||
RKV adhyāya 73
śrīmārkaṇḍeya uvāca:
narmadādakṣiṇe kūle tīrthaṃ paramaśobhanam /
sarvapāpaharaṃ pārtha gopāreśvaramuttamam /
godehānniḥsṛtaṃ liṅgaṃ puṇyaṃ bhūmitale nṛpa

yudhiṣṭhira uvāca:
godehānniḥsṛtaṃ kasmālliṅgaṃ pāpakṣayaṃkaram /
dakṣiṇe narmadākūle maṇināgasamīpataḥ /
saṃkṣepātkathyatāṃ vipra gopāreśvarasambhavam

śrīmārkaṇḍeya uvāca:
kāmadhenustapastatra purā pārtha cakāra ha /
dhyāyate parayā bhaktyā devadevaṃ maheśvaram

tuṣṭastasyā jagannātha kapilāya maheśvaraḥ /
niḥsṛto dehamadhyāttu acchedyaḥ parameśvaraḥ

tuṣṭo devi jaganmātaḥ kapile parameśvari /
ārādhanaṃ kṛtaṃ yasmāt tad vadāśu śubhānane

surabhyuvāca:
lokānām upakārāya sṛṣṭāhaṃ parameṣṭhinā /
lokakāryāṇi sarvāṇi sidhyanti matprasādataḥ

lokāḥ svargaṃ prayāsyanti matprasādena śaṅkara /
tīrthe tvaṃ bhava me śambho lokānāṃ hitakāmyayā

tatheti bhagavānuktvā tīrthe tatrāvasanmudā /
tadāprabhṛti tattīrthaṃ vikhyātaṃ vasudhātale /
snānenaikena rājendra pāpasaṅghaṃ vyapohati

gopāreśvaragodānaṃ yastu bhaktyā ca kārayet /
yogye dvijottame deyā yogyā dhenuḥ sakāñcanā

savatsā taruṇī śubhrā bahukṣīrā savastrakā /
kṛṣṇapakṣe caturdaśyām aṣṭamyāṃ vā pradāpayet

sarveṣu caiva māseṣu kārttike ca viśeṣataḥ /
dāpayet parayā bhaktyā dvije svādhyāyatatpare

vidhinā ca pradadyād yo vidhinā yastu gṛhṇate /
tāvubhau puṇyakarmāṇau prekṣakaḥ puṇyabhājanam

piṇḍadānaṃ prakuryād yaḥ pretānāṃ bhaktisaṃyutaḥ /
piṇḍenaikena rājendra pretā yānti parāṃ gatim

bhaktyā praṇāmaṃ rudrasya ye kurvanti dine dine /
teṣāṃ pāpaṃ pralīyeta bhinnapātre jalaṃ yathā

tatra tīrthe tu yo rājanvṛṣabhaṃ ca samutsṛjet /
pitaraścoddhṛtās tena śivaloke mahīyate

yudhiṣṭhira uvāca:
vṛṣotsarge kṛte tāta phalaṃ yajjāyate nṛṇām /
tatsarvaṃ kathayasvāśu prayatnena dvijottama

śrīmārkaṇḍeya uvāca:
sarvalakṣaṇasampūrṇe vṛṣe caiva tu yatphalam /
tadahaṃ sampravakṣyāmi śṛṇuṣva dharmanandana

kārttike caiva vaiśākhe pūrṇimāyāṃ narādhipa /
rudrasya sannidhau bhūtvā śuciḥ snāto jitendriyaḥ

vṛṣasyaiva samutsargaṃ kārayet prīyatāṃ haraḥ /
sāṃnidhye kārayet putra catasro vatsikāḥ śubhāḥ

dattvā tu vipramukhyāya sarvalakṣaṇasaṃyutāḥ /
prīyatāṃ ca mahādevo brahmā viṣṇurmaheśvaraḥ

vṛṣabhe romasaṃkhyā yā sarvāṅgeṣu narādhipa /
tāvadvarṣapramāṇaṃ tu śivaloke mahīyate

śivaloke vasitvā tu yadā martyeṣu jāyate /
kule mahati sambhūtir dhanadhānyasamākule

nīrogo rūpavāṃścaiva vidyāḍhyaḥ satyavāk śuciḥ /
gopāreśvaramāhātmyaṃ mayā khyātaṃ yudhiṣṭhira /
godehānniḥsṛtaṃ liṅgaṃ narmadādakṣiṇe taṭe