Revākhāṇḍa (revised text) · Chapter 35

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe ravitīrthavarṇanaṃ nāma catustriṃśo 'dhyāyaḥ ||
RKV adhyāya 35
yudhiṣṭhira uvāca:
jalamadhye mahādevaḥ kena tiṣṭhati hetunā /
uttaraṃ dakṣiṇaṃ kūlaṃ varjayitvā dvijottama

śrīmārkaṇḍeya uvāca:
etadākhyānamatulaṃ puṇyaṃ śrutimukhāvaham /
purāṇe yacchrutaṃ tāta tatte vakṣyāmyaśeṣataḥ

tretāyuge mahābhāga rāvaṇo devakaṇṭakaḥ /
trailokyavijayī raudraḥ surāsurabhayaṃkaraḥ

devadānavagandharvair ṛṣibhiśca tapodhanaiḥ /
avadhyo 'tha vimānena yāvatparyaṭate mahīm

tāvaddhindhyagirer madhye dānavo baladarpitaḥ /
mayo nāmeti vikhyāto guhāvāsī tapaścaran

tasya pārśvagato rakṣo vinayād avaniṃ gataḥ /
pūjito dānasanmānair idaṃ vacanam abravīt

kasyeyaṃ padmapatrākṣī pūrṇacandranibhānanā /
kiṃnāmadheyā tapati tapa ugraṃ kathaṃ vibho

maya uvāca:
dānavānāṃ patiḥ śreṣṭho mayo 'haṃ nāma nāmataḥ /
bhāryā tejovatī nāma tasyāstu tanayā śubhā

mandodarīti vikhyātā tapate bhartṛkāraṇāt /
ārādhayantī bhartāramumāyā dayitaṃ śubham

tacchrutvā vacanaṃ tasya rāvaṇo madamohitaḥ /
prasṛtaḥ praṇato bhūtvā mayaṃ vacanam abravīt

paulastyānvayasaṃjāto devadānavadarpahā /
prārthayāmi mahābhāga sutāṃ tvaṃ dātumarhasi

jñātvā paitāmahaṃ vṛttaṃ mayenāpi mahātmanā /
rāvaṇāya sutā dattā pūjayitvā vidhānataḥ

gṛhītvā tāṃ tadā rakṣo 'bhyarcyamāno niśācaraiḥ /
devodyāne vimānaiśca krīḍate sa tayā saha

kenacittvatha kālena rāvaṇo lokarāvaṇaḥ /
putraṃ putravatāṃ śreṣṭho janayāmāsa bhārata

tenaiva jātamātreṇa rāvo mukto mahātmanā /
saṃvartakasya meghasya tena lokā jaḍīkṛtāḥ

śrutvā tannarditaṃ ghoraṃ brahmā lokapitāmahaḥ /
nāma cakre tadā tasya meghanādo bhaviṣyati

evaṃnāmā kṛtaḥ so 'pi paramaṃ vratamāsthitaḥ /
toṣayāmāsa deveśamumayā saha śaṅkaram

vratairniyamadānaiśca homajāpyavidhānataḥ /
kṛcchracāndrāyaṇairnityaṃ kṛśaṃ kurvankalevaram

evam anyaddine tāta kailāsaṃ dharaṇīdharam /
gatvā liṅgadvayaṃ gṛhya prasthito dakṣiṇāmukhaḥ

narmadātaṭam āśritya snātukāmo mahābalaḥ /
nikṣipya pūjayan devaṃ kṛtajāpyo nareśvara

tatrāyatanāvāsena snāto hutahutāśanaḥ /
kṛtakṛtyamivātmānaṃ mānayitvā niśācaraḥ

gantukāmaḥ paraṃ mārgaṃ laṅkāyāṃ nṛpasattama /
ekamuddharato liṅgaṃ praṇataḥ savyapāṇinā

dvitīyaṃ tu dvitīyena bhaktyā paulastyanandanaḥ /
tāvad eva mahāliṅgaṃ patitaṃ narmadāṃbhasi

yāhi yāhīti cetyuktvā jalamadhye pratiṣṭhitaḥ /
namitvā rāvaṇistasya devasya parameṣṭhinaḥ

jagāmākāśam āviśya pūjyamāno niśācaraiḥ /
tadā prabhṛti tattīrthaṃ meghanādeti viśrutam

pūrvaṃ tu garjanaṃ nāma sarvapāpakṣayaṃkaram /
tasmiṃstīrthe tu rājendra yastu snānaṃ samācaret

ahorātroṣito bhūtvā aśvamedhaphalaṃ labhet /
piṇḍadānaṃ tu yaḥ kuryāt tasmiṃstīrthe narādhipa

yatphalaṃ sattrayajñena tadbhavennātra saṃśayaḥ /
tena dvādaśavarṣāṇi pitaraḥ saṃpratarpitāḥ

yastu bhojayate vipraṃ ṣaḍrasātrena bhārata /
akṣayapuṇyam āpnoti tatra tīrthe narottama

prāṇatyāgaṃ tu yaḥ kuryād bhāvito bhāvitātmanā /
sa vasecchāṅkare loke yāvad ā bhūtasamplavam

eṣā te naraśārdūla garjanotpattiruttamā /
kathitā snehabandhena sarvapāpakṣayakarī