Revākhāṇḍa (revised text) · Chapter 214

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe āmaleśvaratīrthamāhātmyavarṇanaṃ nāma trayodaśottaradviśatatamo 'dhyāyaḥ ||
RKV adhyāya 214
śrīmārkaṇḍeya uvāca:
caturthaṃ sampravakṣyāmi devasya caritaṃ mahat /
śrutamātreṇa yenaiva sarvapāpaiḥ pramucyate

kapālī kānthiko bhūtvā yathā sa vyacaranmahīm /
piśācair rākṣasair bhūtair ḍākinīyoginīvṛtaḥ

bhairavaṃ rūpamāsthāya pretāsanaparigrahaḥ /
trailokyasyābhayaṃ dattvā cacāra vipulaṃ tapaḥ

āṣāḍhī tu kṛtā tatra hyāṣāḍhīnāma viśrutam /
kanthā muktā tato 'nyatra devena parameṣṭhinā

tadāprabhṛti rājendra sa kantheśvara ucyate /
tasya darśanamātreṇa hyaśvamedhaphalaṃ labhet

devo mārge punastatra bhramate ca yadṛcchayā /
vikrīṇāti balākāro dṛṣṭvā cokto hareṇa tu

yadi bhadra na cetkopaṃ karoṣi mayi sāmpratam /
balābhirbhara me liṅgaṃ dadāmi bahu te dhanam

evamukto 'tha devena sa vaṇiglobhamohitaḥ /
yojayāmāsa balakā liṅge cottamamadhyamān

tāvadyāvatkṣayaṃ sarve gatāḥ kāle susaṃcitāḥ /
sthitaṃ samunnataṃ liṅgaṃ dṛṣṭvā śokamupāgamat

kṛtvā tu khaṇḍakhaṇḍāni sa devaḥ parameśvaraḥ /
uvāca prahasanvākyaṃ taṃ dṛṣṭvā gatasādhvasam

na ca me pūritaṃ liṅgaṃ yāsyāmi yadi manyase /
dadāmi tatra vittaṃ te yadi liṅgaṃ prapūritam

vaṇiguvāca:
adhanyaḥ kṛtapuṇyo 'haṃ nigrāhyaḥ parameśvara /
tava priyam akurvāṇaḥ śociṣye śāśvatīḥ samāḥ

etacchrutvā vacas tasya vaṇikputrasya bhārata /
asaṃkṣayaṃ dhanaṃ dattvā sthitas tatra maheśvaraḥ

tadā prabhṛti rājendra balākairiva bhūṣitam /
pratyayārthaṃ sthitaṃ liṅgaṃ lokānugrahakāmyayā

devena racitaṃ pārtha krīḍayā supratiṣṭhitam /
devamārgam iti khyātaṃ triṣu lokeṣu viśrutam /
paśyan prapūjayan vāpi sarvapāpaiḥ pramucyate

devamārge tu yo gatvā pūjayed balākeśvaram /
pañcāyatanamāsādya rudralokaṃ sa gacchati

devamārge mṛtānāṃ tu narāṇāṃ bhāvitātmanām /
na bhavet punarāvṛttī rudralokāt kadācana

devamārgasya māhātmyaṃ bhaktyā śrutvā narottama /
mucyate sarvapāpebhyo nātra kāryā vicāraṇā