Revākhāṇḍa (revised text) · Chapter 183

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe bhṛgukacchatīrthamāhātmyavarṇanaṃ nāma dvyaśītyuttaraśatatamo 'dhyāyaḥ ||
RKV adhyāya 183
śrīmārkaṇḍeya uvāca:
ataḥ paraṃ mahārāja gacchet kedārasaṃjñakam /
yatra gatvā mahārāja śrāddhaṃ kṛtvā pibejjalam /
sampūjya devadeveśaṃ kedārotthaṃ phalaṃ labhet

yudhiṣṭhira uvāca:
katham atra suraśreṣṭha kedārākhyaḥ sthitaḥ svayam /
uttare narmadākūle etadvistarato vada

śrīmārkaṇḍeya uvāca:
purā kṛtayugasyādau śaṅkaras tu maheśvaraḥ /
bhṛguṇārādhitaḥ śaptaḥ śriyā ca bhṛgukacchake

apavitramidaṃ kṣetraṃ sarvavedavivarjitam /
bhaviṣyati nṛpaśreṣṭha gatetyuktvā haripriyā

tapaścacāra vipulaṃ bhṛgurvarṣasahasrakam /
vāyubhakṣo nirāhāraściraṃ dhamanisaṃtataḥ

tataḥ pratyakṣatāmāgāl liṅgībhūto maheśvaraḥ /
prādurbhūtastu sahasā bhittvā pātālasaptakam

dadarśātha bhṛgurdevam autpalīṃ kelikāmiva /
stutiṃ cakre sa devāya sthāṇave tryambaketi ca

evaṃ stutaḥ sa bhagavān provāca prahasanniva /
punaḥ punarbhṛguṃ mattaḥ kiṃtu prārthayase mune

bhṛguruvāca:
pañcakrośamidaṃ kṣetraṃ padmayā śāpitaṃ vibho /
upavitram idaṃ kṣetraṃ sarvavedavivarjitam /
bhaviṣyatīti ca procya gatā devī vidaṃ prati

punaḥ pavitratāṃ yāti yathedaṃ kṣetramuttamam /
tathā kuru maheśāna prasanno yadi śaṅkara

īśvara uvāca:
kedārākhyamidaṃ brahmaṃl liṅgamādyaṃ bhaviṣyati /
kṛtvedamādiliṅgāni bhaviṣyanti daśaiva hi

ekādaśam adṛśyaṃ hi kṣetramadhye bhaviṣyati /
pāvayiṣyati tatkṣetramekādaśaḥ svayaṃ vibhuḥ

tathā vai dvādaśādityā matprasādāttu mūrtitaḥ /
vasiṣyanti bhṛgukṣetre rogaduḥkhanibarhaṇāḥ

durgāḥ hyaṣṭādaśa tathā kṣetrapālāstu ṣoḍaśa /
bhṛgukṣetre bhaviṣyanti vīrabhadrāśca mātaraḥ

pavitrīkṛtametaddhi nityaṃ kṣetraṃ bhaviṣyati /
nāghamāse hyuṣaḥkāle snātvā māsaṃ jitendriyaḥ

yaḥ pūjayati kedāraṃ sa gacchecchivamandiram /
tasmiṃstīrthe naraḥ snātvā pitḥnuddiśya bhārata /
śrāddhaṃ dadāti vidhivat tasya prītāḥ pitāmahāḥ

iti te kathitaṃ samyakkedārākhyaṃ savistaram /
sarvapāpaharaṃ puṇyaṃ sarvaduḥkhapraṇāśanam