Revākhāṇḍa (revised text) · Chapter 177
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe piṅgaleśvaratīrthamāhātmyavarṇanaṃ nāma ṣaṭsaptatyuttaraśatatamo 'dhyāyaḥ ||
RKV adhyāya 177
śrīmārkaṇḍeya uvāca:
bhūtīśvaraṃ tato gacchetsarvatīrtheṣvanuttamam /
darśanād eva rājendra yasya pāpaṃ praṇaśyati
tatra sthāne purā pārtha devadevena śūlinā /
uddhūlanaṃ kṛtaṃ gātre tena bhūtīśvaraṃ tu tat
puṣye vā janmanakṣatre amāvāsyāṃ viśeṣataḥ /
bhūtīśvare naraḥ snātvā kulakoṭiṃ samuddharet
tatra sthāne tu yo bhaktyā kurute hyaṅgaguṇṭhanam /
tasya yatphalamuddiṣṭaṃ tacchṛṇuṣva narādhipa
yāvanto bhūtikaṇikā gātre lagnāḥ śivālaye /
tāvadvarṣasahasrāṇi śivaloke mahīyate
sarveṣāmeva snānānāṃ bhasmasnānaṃ paraṃ smṛtam /
purāṇair ṛṣibhiḥ proktaṃ sarvaśāstreṣvanuttamam
ekakālaṃ dvikālaṃ vā trikālaṃ cāpi yaḥ sadā /
snānaṃ karoti cāgneyaṃ pāpaṃ tasya praṇaśyati
divyasnānādvaraṃ snānaṃ vāyavyaṃ bharatarṣabha /
vāyavyāduttamaṃ brāhmyaṃ varaṃ brāhmyāt tu vāruṇam
āgneyaṃ vāruṇācchreṣṭhaṃ yasmāduktaṃ svayambhuvā /
tasmātsarvaprayatnena hyāgneyaṃ snānam ācaret
yudhiṣṭhira uvāca:
āgneyaṃ vāruṇaṃ brāhmyaṃ vāyavyaṃ divyameva ca /
kimuktaṃ śrotum icchāmi paraṃ kautūhalaṃ hi me
mārkaṇḍeya uvāca:
āgneyaṃ bhasmanā snānamavagāhya ca vāruṇam /
āpohiṣṭheti ca brāhmyaṃ vāyavyaṃ gorajaḥ smṛtam
sūrye dṛṣṭe tu yatsnānaṃ gaṅgātoyena tatsamam /
tatsnānaṃ pañcamaṃ proktaṃ divyaṃ pāṇḍavasattama
tasmātsarvaprayatnena snātvā bhūtīśvare tu yaḥ /
pūjayed devamīśānaṃ sa bāhyābhyantaraḥ śuciḥ
tatra sthāne tu ye nityaṃ dhyāyanti paramaṃ padam /
sūkṣmaṃ cātīndriyaṃ nityaṃ te dhanyā nātra saṃśayaḥ
muktitīrthaṃ tu tattīrthaṃ sarvatīrtheṣvanuttamam /
darśanādeva yasyaiva pāpaṃ yāti mahatkṣayam
jāyate pūjayā rājyaṃ tatra stutvā maheśvaram /
japena pāpasaṃśuddhirdhyānenānantyamaśnute
oṃ jyotiḥ svarūpam anādimadhyam anutpādyamānam anucāryamāṇākṣaram /
sarvabhūtasthitaṃ śivaṃ sarvayogeśvaraṃ sarvalokeśvaraṃ mohaśokahīnaṃ mahājñānagamyam
tatra tīrthe tu yo gatvā snānaṃ kuryānnareśvara /
aśvamedhasya yajñasya phalaṃ prāpnoti mānavaḥ /
evambhūtaṃ na jānanti mokṣāpekṣaṇikā narāḥ
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0