Revākhāṇḍa (revised text) · Chapter 158
|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe huṅkārasvāmitīrthamāhātmyavarṇanaṃ nāma saptapañcāśadadhikaśatatamo 'dhyāyaḥ ||
RKV adhyāya 158
śrīmārkaṇḍeya uvāca:
tato gacchetparaṃ tīrthaṃ saṅgameśvaramuttamam /
narmadādakṣiṇe kūle sarvapāpabhayāpaham
dhanadastatra viśrānto muhūrtaṃ nṛpasattama /
pitṛlokātsamāyātaḥ kailāsaṃ dharaṇīdharam
pratyayārthaṃ nṛpaśreṣṭha hyadyāpi dharaṇītale /
kṛṣṇavarṇā hi pāṣāṇā dṛśyante sphaṭikojjvalāḥ
vindhyanirjharaniṣkrāntā puṇyatoyā saridvarā /
praviṣṭā narmadātoye sarvapāpapraṇāśane
saṅgame tatra yaḥ snātvā pūjayet saṅgameśvaram /
aśvamedhasya yajñasya phalaṃ prāpnoty asaṃśayam
ghaṇṭāpatākāvitanaṃ yo dadetsaṅgameśvare /
haṃsayuktavimānastho divyastrīśatasaṃvṛtaḥ
sa rudrapadamāpnoti rudrasyānucaro bhavet /
dadhi bhakte na devasya yaḥ kuryālliṅgapūraṇam
sikthasaṃkhyaṃ śive loke sa vaset kālam īpsitam /
śrīphalaiḥ pūrayelliṅgaṃ niḥsvo bhūtvā bhavasya tu
so 'pi tatphalamāpnoti gataḥ svarge nareśvara /
akṣayā santatistasya jāyate saptajanmasu
snapanaṃ devadevasya dadhnā madhughṛtena vā /
yaḥ karoti vidhānena tasya puṇyaphalaṃ śṛṇu
dhṛtakṣīravahā nadyo yatra vṛkṣā madhusravāḥ /
tatra te mānavā yānti suprasanne maheśvare
patraṃ puṣpaṃ phalaṃ toyaṃ yastu dadyānmaheśvare /
tatsarvaṃ saptajanmāni hyakṣayaṃ phalam aśnute
sarveṣāmeva pātrāṇāṃ mahāpātraṃ maheśvaraḥ /
tasmāt sarvaprayatnena pūjanīyo maheśvaraḥ
brahmacaryasthito nityaṃ yastu pūjayate śivam /
iha jīvansa deveśo mṛto gacched anāmayam
śive tu pūjite pārtha yatphalaṃ prāpyate budhaiḥ /
yogīndre caiva tatpārtha pūjite labhate phalam
te dhanyāste mahātmānas teṣāṃ janma sujīvitam /
yeṣāṃ gṛheṣu bhuñjanti śivabhaktiratā narāḥ
saṃnirudhyendriyagrāmaṃ yatrayatra vasenmuniḥ /
tatra tatra kurukṣetraṃ naimiṣaṃ puṣkarāṇi ca
yatphalaṃ vedaviduṣi bhojite śatasaṃkhyayā /
tatphalaṃ jāyate pārtha hyekena śivayoginā
yatra bhuñjati bhasmāṅgī mūrkho vā yadi paṇḍitaḥ /
tatra bhuñjati deveśaḥ sapatnīko vṛṣadhvajaḥ
viprāṇāṃ vedaviduṣāṃ koṭiṃ saṃbhojya yatphalam /
bhikṣāmātrapradānena tatphalaṃ śivayoginām
saṅgameśvaramāsādya prāṇatyāgaṃ karoti yaḥ /
na tasya punarāvṛttiḥ śivalokāt kadācana
Original text: Revākhāṇḍa of the Vāyupurāṇa (RKV) · Edition: Śrīkṛṣṇadās, Kṣemrāj (ed.): Śrīskandamahāpurāṇam. Veṅkateśvara Steam Press, Bombay: 1910 and its reprint: Siṃha, Nāgaśaraṇa (ed.): Śrīskandamahāpurāṇam. pañcama bhāga: śrī āvantyakhaṇḍam. Nag Publishers, Delhi: 1986. · Data entry Jürgen Neuss · GRETIL (Göttingen) · CC BY-NC-SA 4.0