Revākhāṇḍa (revised text) · Chapter 121

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe kambukeśvaratīrthamāhātmyavarṇanaṃ nāma viṃśatyuttaraśatatamo 'dhyāyaḥ ||
RKV adhyāya 121
mārkaṇḍeya uvāca:
tato gacchenmahīpāla candrahāsamataḥ param /
yatra siddhiṃ parāṃ prāptaḥ somarājaḥ surottamaḥ

yudhiṣṭhira uvāca:
kathaṃ siddhiṃ parāṃ prāptaḥ somanātho jagatpatiḥ /
tatsarvaṃ śrotumicchāmi kathayasva mamānagha

śrīmārkaṇḍeya uvāca:
purā śapto munīndreṇa dakṣeṇa kila bhārata /
asevanāddhi dārāṇāṃ kṣayarogī bhaviṣyasi

udvāhitānāṃ patnīnāṃ ye na kurvanti sevanam /
yā niṣṭhā jāyate nṛṇāṃ tāṃ śṛṇuṣva narādhipa

ṛtāvṛtau hi nārīṇāṃ sevanājjāyate sutaḥ /
sutātsvargaśca mokṣaśca ityevaṃ śrutibhāṣitam

tatkālocitadharmeṇa veṣṭito raurave patet /
tasyāstadrudhiraṃ pāpaḥ pibate kālamīpsitam

tato 'vatīrṇaḥ kālena yāṃ yāṃ yoniṃ prayāsyati /
tasyāṃ tasyāṃ sa duṣṭātmā durbhago jāyate sadā

nārīṇāṃ tu sadā kāmo 'bhyadhikāḥ parivartate /
viśeṣeṇa ṛtau kāle pīḍyate kāmasāyakaiḥ

paribhūtā hitā bhartrā dhyāyante 'nyaṃ patiṃ striyaḥ /
tataḥ putraḥ samutpanno hyaṭate kulamuttamam

svargasthāstena pitaraḥ pūrvajāste pitāmahāḥ /
patanti jātamātreṇa kulaṭastena cocyate

tena karmavipākena kṣayarogyabhavacchaśī /
tyaktvā lokaṃ surendrāṇāṃ martyalokamupāgataḥ

tatastīrthānyanekāni puṇyānyāyatanāni ca /
bhramanvai narmadāṃ prāptaḥ sarvapāpapraṇāśanīm

upavāsaṃ ca dānāni vratāni niyamāṃs tathā /
cacāra dvādaśābdāni tato muktaḥ sa kilbiṣaiḥ

snāpayitvā mahādevaṃ sarvapātakanāśanam /
jagāma prabhayā pūrṇaḥ sa ca lokamanuttamam

yenaiva sthāpito devaḥ pūjyate varṣasaṃkhyayā /
tāvadvarṣasahasrāṇi rudraloke sa pūjyate

tena devānvidhānoktānsthāpayanti narā bhuvi /
akṣayaṃ cāvyayaṃ yasmātkālaṃ bhuñjanti mānavāḥ

somatīrthe naraḥ snātvā pūjayeddevamīśvaram /
sa bhrājate naro loke somavat priyadarśanaḥ

candrahāse tu yo gatvā grahaṇe candrasūryayoḥ /
snānaṃ samācared bhaktyā mucyate sarvakilbiṣaiḥ

tatra snānaṃ ca dānaṃ ca candrahāse śubhāśubham /
kṛtaṃ nṛpavaraśreṣṭha sarvaṃ bhavati cākṣayam

te dhanyāste mahātmānas teṣāṃ janma sujīvitam /
candrahāse tu ye snātvā paśyanti grahaṇaṃ narāḥ

vācikaṃ mānasaṃ pāpaṃ karmajaṃ yatpurākṛtam /
snānamātreṇa rājendra tatra tīrthe praṇaśyati

bahavastaṃ na jānanti mahāmohasamanvitāḥ /
dehasthamiva sarveṣāṃ paramānandarūpiṇam

paścime sāgare gatvā somatīrthe tu yatphalam /
tatsamagram avāpnoti candrahāse na saṃśayaḥ

saṃkrāntau ca vyatīpāte ayane viṣuve tathā /
candrahāse naraḥ snātvā sarvapāpaiḥ pramucyate

te mūḍhāste durācārāsteṣāṃ janma nirarthakam /
candrahāsaṃ na jānanti ye revāyāṃ vyavasthitam

candrahāse tu yaḥ kaścitsaṃnyāsaṃ kurute dvijaḥ /
anivartikā gatistasya somalokānna saṃśayaḥ