Revākhāṇḍa (revised text) · Chapter 106

|| iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe karañjatīrthamāhātmyavarṇanaṃ nāma pañcādhikaśatatamo 'dhyāyaḥ ||
RKV adhyāya 106
śrīmārkaṇḍeya uvāca:
tato gacchenmahīpāla tīrthaṃ paramaśobhanam /
saubhāgyakaraṇaṃ divyaṃ naranārīmanoramam

tatra yā durbhagā nārī naro vā nṛpasattama /
snātvārcayed umārudrau saubhāgyaṃ tasya jāyate

tṛtīyāyāmahorātraṃ sopavāso jitendriyaḥ /
nimantrayed dvijaṃ bhaktyā sapatnīkaṃ surūpiṇam

gandhamālyairalaṃkṛtya vastradhūpādivāsitam /
bhojayet pāyasānnena kṛsareṇātha bhaktitaḥ

bhojayitvā yathānyāyaṃ pradakṣiṇamudāharet /
prīyatāṃ me mahādevaḥ sapatnīko vṛṣadhvajaḥ

yathā te devadeveśa na viyogaḥ kadācana /
mamāpi karuṇāṃ kṛtvā tathāstviti vicintayet

evaṃ kṛte tatastasya yatpuṇyaṃ samudāhṛtam /
tatte sarvaṃ pravakṣyāmi yathā devena bhāṣitam

daurbhāgyaṃ durgatiścaiva dāridryaṃ śokabandhanam /
vandhyatvaṃ saptajanmāni jāyate na yudhiṣṭhira

jyeṣṭhamāse site pakṣe tṛtīyāyāṃ viśeṣataḥ /
tatra gatvā tu yo bhaktyā pañcāgniṃ sādhayettataḥ

so 'pi pāpairaśeṣaistu mucyate nātra saṃśayaḥ /
guggulaṃ dahate yastu dvidhā cittavivarjitaḥ

śarīraṃ bhedayed yastu gauryāścaiva samīpataḥ /
tasminkarmapraviṣṭasya utkrāntir jāyate yadi

dehapāte vrajet svargam ityevaṃ śaṅkaro 'bravīt /
sitaraktaistathā pītairvastraiśca vividhaiḥ śubhaiḥ

brāhmaṇīṃ brāhmaṇaṃ caiva pūjayitvā yathāvidhi /
puṣpairnānāvidhaiścaiva gandhadhūpaiḥ suśobhanaiḥ

kaṇṭhasūtrakasindūraiḥ kuṅkumena vilepayet /
kalpayeta striyaṃ gaurīṃ brāhmaṇaṃ śivarūpiṇam

teṣāṃ tadrūpakaṃ kṛtvā dānamutsṛjyate tataḥ /
kaṅkaṇaṃ karṇaveṣṭaṃ ca kaṇṭhikāṃ mudrikāṃ tathā

saptadhānyaṃ tathā caiva bhojanaṃ nṛpasattama /
anyānyapi ca dānāni tasmiṃstīrthe dadāti yaḥ

sarvadānaiśca yatpuṇyaṃ prāpnuyānnātra saṃśayaḥ /
sahasraguṇitaṃ sarvaṃ nātra kāryā vicāraṇā

śaṅkareṇa samaṃ tasmādbhogaṃ bhuṅkte hyanuttamam /
saubhāgyaṃ tasya vipulaṃ jāyate nātra saṃśayaḥ

aputro labhate putramadhano dhanamāpnuyāt /
rājendra kāmadaṃ tīrthaṃ narmadāyāṃ vyavasthitam