rāvaṇāya brahmadattaḥ śivamantraḥ · Chapter 1

yadi tuṣṭo'si me deva anugrāhyo yadi hyaham /
yadi mantreśvaro deyo dīyatāṃ mama dhārmika

yaṃ japtvā'haṃ mahābhāga sarvadeveṣu nirbhayaḥ /
amareṣu ca sarveṣu dānaveṣu patatriṣu /
tvatprasādāttu deveśa na bhayaṃ vidyate mama

evamukto daśagrīvaṃ brahmā vacanamabravīt /
praṇātyaye tu vai dadmi na nityaṃ rākṣasādhipa

akṣasūtraṃ gṛhītvā tu japenmantramimaṃ śubham /
japtvā tu rākṣasapate tvamajeyo bhaviṣyasi /
ajaptvā rākṣasaśreṣṭha na te siddhirbhaviṣyati

śṛṇu mantraṃ pravakṣyāmi yena rākṣasapuṅgava /
mantrasya kīrtanādeva prāpsyase samare jayam

namaste devadeveśa surāsuranamaskṛta /
bhūtabhavyamahādeva hara piṅgalalocana

bālastvaṃ vṛddharūpī ca vaiyāghravasanacchada /
āruṇeyo'si deva tvaṃ trailokyaprabhurīśvaraḥ

haro haritanemistvaṃ yugāntadahano'nalaḥ /
gaṇeśo lokaśambhuśca lokapālo mahābhujaḥ

mahādevo mahāśūlī mahādaṃṣṭro mahābhujaḥ /
kālaśca kālarūpī ca nīlagrīvo mahodaraḥ

vedāntago vedamayaḥ paśūnāṃpatiravyayaḥ /
śūladhṛcchūlaketuśca netā goptā hariḥ śivaḥ

jaṭī muṇḍī śikhaṇḍī ca laguḍī ca mahāyaśāḥ /
bhūteśvaro gaṇādhyakṣaḥ sarvātmā sarvabhāvanaḥ

sarvadaḥ sarvahārī ca sraṣṭā ca gururavyayaḥ /
kamaṇḍaludharo devaḥ pinākī dhūrjaṭistathā

mānanīyo'rhaṇīyaśca oṃkāraḥ sāmavedagaḥ /
mṛtyuśca mṛtyudūtaśca pāriyātraśca suvrataḥ

brahmacārī gṛhī yogī vīṇāpaṇavatūṇavān /
amaro darśanīyaśca bālasūryanibhastathā

śmaśānacārī bhagavānumāpatirarindamaḥ /
bhaganetraḥ prahartā ca pūṣadantanipātanaḥ

jvarahartā pāśahastaḥ pralayaḥ kāla eva ca /
ulkāmukho'gniketuśca munirdīpto viśāṃpatiḥ

unmādamohanakaraḥ samarthastridaśottamaḥ /
vāmano vāmadevaśca prāgdakṣiṇyaśca nāmataḥ

cakrahastaḥ pratiṣṭambhī camūnāṃ stambhanastathā

ṛturṛtukaraḥ kālo madhurmadhuralocanaḥ /
vānaspatyaḥ śīkaraśca nityamāśritapūjitaḥ

jagaddhātā ca kartā ca puruṣaḥ śāśvato hyajaḥ /
dharmādhyakṣo virūpākṣastrivartmā bhūtabhāvanaḥ

trinetro bahunetraśca sūryāyutasamaprabhaḥ /
devadevo'bhidevaśca candrāṅkitajaṭastathā

nartako lāsakaścaiva pūrṇendusadṛśānanaḥ /
subrahmaṇyaḥ śaraṇyaśca sarvadevamayastathā

sarvabhūtanivāsaśca sarvabandhavimocakaḥ /
mohano vañcakaścaiva sarpadhārī varottamaḥ

puṣpadanto vibhāgaśca mukhyaḥ sarvaharastathā /
hariśmaśrurdhanurdhārī bhīmo bhīmaparākramaḥ /
bhaktābhīṣṭapradaḥ sthāṇuḥ paramātmā sanātanaḥ

mayā proktamidaṃ puṇyaṃ nāmnāmaṣṭottaraṃ śatam /
sarvapāpaharaṃ puṇyaṃ śaraṇyaṃ śaraṇārthinām/
japyametaddaśagrīva kuryācchatruvināśanam