રાવણાય બ્રહ્મદત્તઃ શિવમન્ત્રઃ · અધ્યાય 1

યદિ તુષ્ટોઽસિ મે દેવ અનુગ્રાહ્યો યદિ હ્યહમ્ ।
યદિ મન્ત્રેશ્વરો દેયો દીયતાં મમ ધાર્મિક

યં જપ્ત્વાઽહં મહાભાગ સર્વદેવેષુ નિર્ભયઃ ।
અમરેષુ ચ સર્વેષુ દાનવેષુ પતત્રિષુ ।
ત્વત્પ્રસાદાત્તુ દેવેશ ન ભયં વિદ્યતે મમ

એવમુક્તો દશગ્રીવં બ્રહ્મા વચનમબ્રવીત્ ।
પ્રણાત્યયે તુ વૈ દદ્મિ ન નિત્યં રાક્ષસાધિપ

અક્ષસૂત્રં ગૃહીત્વા તુ જપેન્મન્ત્રમિમં શુભમ્ ।
જપ્ત્વા તુ રાક્ષસપતે ત્વમજેયો ભવિષ્યસિ ।
અજપ્ત્વા રાક્ષસશ્રેષ્ઠ ન તે સિદ્ધિર્ભવિષ્યતિ

શૃણુ મન્ત્રં પ્રવક્ષ્યામિ યેન રાક્ષસપુઙ્ગવ ।
મન્ત્રસ્ય કીર્તનાદેવ પ્રાપ્સ્યસે સમરે જયમ્

નમસ્તે દેવદેવેશ સુરાસુરનમસ્કૃત ।
ભૂતભવ્યમહાદેવ હર પિઙ્ગલલોચન

બાલસ્ત્વં વૃદ્ધરૂપી ચ વૈયાઘ્રવસનચ્છદ ।
આરુણેયોઽસિ દેવ ત્વં ત્રૈલોક્યપ્રભુરીશ્વરઃ

હરો હરિતનેમિસ્ત્વં યુગાન્તદહનોઽનલઃ ।
ગણેશો લોકશમ્ભુશ્ચ લોકપાલો મહાભુજઃ

મહાદેવો મહાશૂલી મહાદંષ્ટ્રો મહાભુજઃ ।
કાલશ્ચ કાલરૂપી ચ નીલગ્રીવો મહોદરઃ

વેદાન્તગો વેદમયઃ પશૂનાંપતિરવ્યયઃ ।
શૂલધૃચ્છૂલકેતુશ્ચ નેતા ગોપ્તા હરિઃ શિવઃ

જટી મુણ્ડી શિખણ્ડી ચ લગુડી ચ મહાયશાઃ ।
ભૂતેશ્વરો ગણાધ્યક્ષઃ સર્વાત્મા સર્વભાવનઃ

સર્વદઃ સર્વહારી ચ સ્રષ્ટા ચ ગુરુરવ્યયઃ ।
કમણ્ડલુધરો દેવઃ પિનાકી ધૂર્જટિસ્તથા

માનનીયોઽર્હણીયશ્ચ ઓંકારઃ સામવેદગઃ ।
મૃત્યુશ્ચ મૃત્યુદૂતશ્ચ પારિયાત્રશ્ચ સુવ્રતઃ

બ્રહ્મચારી ગૃહી યોગી વીણાપણવતૂણવાન્ ।
અમરો દર્શનીયશ્ચ બાલસૂર્યનિભસ્તથા

શ્મશાનચારી ભગવાનુમાપતિરરિન્દમઃ ।
ભગનેત્રઃ પ્રહર્તા ચ પૂષદન્તનિપાતનઃ

જ્વરહર્તા પાશહસ્તઃ પ્રલયઃ કાલ એવ ચ ।
ઉલ્કામુખોઽગ્નિકેતુશ્ચ મુનિર્દીપ્તો વિશાંપતિઃ

ઉન્માદમોહનકરઃ સમર્થસ્ત્રિદશોત્તમઃ ।
વામનો વામદેવશ્ચ પ્રાગ્દક્ષિણ્યશ્ચ નામતઃ

ચક્રહસ્તઃ પ્રતિષ્ટમ્ભી ચમૂનાં સ્તમ્ભનસ્તથા

ઋતુરૃતુકરઃ કાલો મધુર્મધુરલોચનઃ ।
વાનસ્પત્યઃ શીકરશ્ચ નિત્યમાશ્રિતપૂજિતઃ

જગદ્ધાતા ચ કર્તા ચ પુરુષઃ શાશ્વતો હ્યજઃ ।
ધર્માધ્યક્ષો વિરૂપાક્ષસ્ત્રિવર્ત્મા ભૂતભાવનઃ

ત્રિનેત્રો બહુનેત્રશ્ચ સૂર્યાયુતસમપ્રભઃ ।
દેવદેવોઽભિદેવશ્ચ ચન્દ્રાઙ્કિતજટસ્તથા

નર્તકો લાસકશ્ચૈવ પૂર્ણેન્દુસદૃશાનનઃ ।
સુબ્રહ્મણ્યઃ શરણ્યશ્ચ સર્વદેવમયસ્તથા

સર્વભૂતનિવાસશ્ચ સર્વબન્ધવિમોચકઃ ।
મોહનો વઞ્ચકશ્ચૈવ સર્પધારી વરોત્તમઃ

પુષ્પદન્તો વિભાગશ્ચ મુખ્યઃ સર્વહરસ્તથા ।
હરિશ્મશ્રુર્ધનુર્ધારી ભીમો ભીમપરાક્રમઃ ।
ભક્તાભીષ્ટપ્રદઃ સ્થાણુઃ પરમાત્મા સનાતનઃ

મયા પ્રોક્તમિદં પુણ્યં નામ્નામષ્ટોત્તરં શતમ્ ।
સર્વપાપહરં પુણ્યં શરણ્યં શરણાર્થિનામ્।
જપ્યમેતદ્દશગ્રીવ કુર્યાચ્છત્રુવિનાશનમ્