Rasaratnākara · Chapter 3.20

RRĀ, 3, 20
sāṅgopāṅgam anekayoganicayaṃ sāraṃ varaṃ coddhṛtaṃ yuktaṃ pāradabandhanaṃ mṛduhaṭhāt dṛṣṭaṃ paraṃ yanmayā /
tatsarvaṃ sugamaṃ pravacmi sahasā siddhānanādāgataṃ pratyakṣānubhavena vārtikagaṇaiḥ sāmrājyadaṃ vīkṣyatāt

{pāradabandhana (1)}
śuddhapāradabhāgaikaṃ ṭaṅkaṇena samaṃ samam /
mardayettriphalākvāthairnaramūtrairyutaistataḥ

karṣāṃśā gulikāḥ kṛtvā māṣacūrṇairjalānvitaiḥ /
sūtādṛṣṭaguṇairliptvā chāyāśuṣkāṃ dhamed dṛḍham

koṣṭhīyantre vaṃkanāle kiṭṭaṃ bhittvā samāharet /
raso'sau vartulākāraḥ ṣaṇḍabaddho bhavatyalam

{pāradabandhanam (2)}
āraṇyamallikādrāvairmūṣāṃ kanyādravaiśca vā /
dravairhariṇakhuryā vā naramūtrayutaṃ rasam

tridinaṃ mardayetkhalve mūtraṃ dattvā punaḥ punaḥ /
tadvaṭīṃ māṣapiṣṭena liptvā dhāmyaṃ ca pūrvavat

tadvatsūto bhavedbaddhastacchodhyaṃ kācaṭaṃkaṇaiḥ

{pāradabandhanam (3)}
markaṭīmūlajadrāvaiḥ pāradaṃ mardayeddinam /
markaṭīmūlaje piṇḍe kṣipettanmarditaṃ rasam

tatpiṇḍe vajramūṣāyāṃ ruddhvā tīvrāgninā dhamet /
jāyate khoṭabaddho'yaṃ sarvakāryakarakṣamaḥ

{pāradabandhanam (4)}
arkamūlaṃ ravikṣīraiḥ piṣṭvā mūṣāṃ ghanaṃ kṣipet /
tanmadhye jāritaṃ sūtaṃ kṣiptvā ruddhvātha rodhayet

mṛṇmaye saṃpuṭe taṃ ca nirundhyāllohasaṃpuṭe /
tato gajapuṭe pacyāt pārado bandhamāpnuyāt

{pāradabandhanam (5)}
jalakumbhyā dravaiḥ sūtaṃ mardayeddivasatrayam /
jalakumbhyā dalairmūṣāṃ kṛtvā tatra kṣipettu tat

ruddhvā tāṃ vajramūṣāyāṃ chāyāśuṣkāṃ puṭellaghu /
utpalaikaikavṛddhyā tu viṃśadvāraṃ puṭaiḥ pacet

tato gajapuṭaṃ deyaṃ samyagbaddho bhavedrasaḥ

{pāradabandhanam (6)}
ekavīrādravairmardyaṃ tridinaṃ śuddhapāradam /
ekavīrākandakalkairvajramūṣāṃ pralepayet /
tasyāṃ pūrvarasaṃ ruddhvā dhmāte baddho bhavedrasaḥ

{pāradabandhanam (7)}
āraktakṣīrakaṃdotthadravaistrīn stanyasaṃyutaiḥ /
tridinaṃ pāradaṃ mardyaṃ vajrakaṃdadravais tryaham

kṣīrakaṃdasya kalkena vajramūṣāṃ pralepayet /
tatra pūrvarasaṃ ruddhvā dhmāte baddho bhavedrasaḥ

{pāradabandhanam (8)}
kṛtvā tāmramayaṃ cakraṃ vistīrṇaṃ caturaṅgulam /
unnataṃ cāṅgulīkaṃ tu sudṛḍhaṃ vartulaṃ samam

gaṃdhakaṃ pāradaṃ tutthaṃ kuryātkhalvena kajjalīm /
tatkajjalaṃ tāmratulyaṃ mūṣāmadhye vinikṣipet

taṃ cakraṃ mūṣikāvaktre dattvā ruddhvātha śoṣayet /
taṃ paceddhaṇḍikāyaṃtre dviyāmaṃ laghuvahninā

uddhṛtya grāhayeccakrādrasarājaṃ punaḥ punaḥ /
tattulyaṃ ṭaṃkaṇaṃ kācamūrdhvādhastasya dāpayet

aṃdhamūṣāgataṃ dhāmyamevaṃ vāratraye kṛte /
rasendro jāyate baddho hyakṣīṇo nātra saṃśayaḥ

{pāradabandhanam (9)}
śuddhasūtaṃ samaṃ gaṃdhaṃ dvābhyāṃ tulyaṃ ca tālakam /
mardyamunmattakadrāvaiḥ khalve yāmacatuṣṭayam

pātayetpātanāyaṃtre dinaikaṃ mandavahninā /
ūrdhvalagnamadhaḥsthaṃ ca tatsarvaṃ tu samāharet

mardyam unmattakadrāvair dṛḍhaṃ yāmacatuṣṭayam /
tadgolaṃ pūrvavatpācyaṃ punarādāya mardayet

punaḥ pācyaṃ punarmardyam ūrdhvādhaḥsthaṃ prayatnataḥ /
sarvaṃ yāvadadho bhāṇḍe tiṣṭhate tāvatāvadhiḥ

tatsarvaṃ pūrvavanmardyaṃ golaṃ kṛtvātha śoṣayet /
samyak saṃpeṣayedamlairnalikaṃ kuṣṭhameva ca

pītāñjanaṃ vā peṣyaṃ ca tena golaṃ pralepayet /
vajramūṣodare cātha tena kalkena lepya vai

golakaṃ tāpayettatra vaṃkanālena taṃ dhaman /
khoṭabaddho bhavetsākṣāt tīvradhāmānalena tu

{pāradabandhanam (10)}
palaṃ sūtaṃ palaṃ nāgaṃ dvābhyāṃ tulyā manaḥśilā /
pūrvavatkramayogena khoṭabaddho bhavedrasaḥ

{pāradabandhanam (11)}
nāgaṃ tāraṃ samaṃ drāvyaṃ taccūrṇaṃ palamātrakam /
śuddhasūtaṃ palaikaṃ ca sarvatulyā manaḥśilā /
pūrvavatkramayogena khoṭabaddho bhavedrasaḥ

{mercury:: bandhana}
palaṃ sūtaṃ palaṃ tāraṃ piṣṭamamlena kenacit /
dvābhyāṃ tulyā śilā yojyā pūrvayogena pācayet

{mercury:: bandhana}
tāravat svarṇapiṣṭīṃ ca gaṃdhakena ca pūrvavat

{mercury:: bandhana}
kṛṣṇābhrakasya satvaṃ ca tīkṣṇaṃ kāṃtaṃ ca hāṭakam /
śulbaṃ tāraṃ ca mākṣīkaṃ samaṃ sūkṣmaṃ vicūrṇayet /
vajramūṣāgataṃ ruddhvā dhmāte khoṭaṃ bhavettu tat

{mercury:: bandhana}
śvetābhrakasya satvaṃ ca tāraṃ tīkṣṇaṃ ca mākṣikam /
samaṃ cūrṇya kṛtaṃ khoṭaṃ khoṭāṃśaṃ śuddhasūtakam

haritālaṃ dvayostulyaṃ sūkṣmaṃ mardyaṃ ca pūrvavat /
mahadagnigataṃ dhmātaṃ khoṭaṃ bhavati tadrasam

{mercury:: bandhana}
pāradaṃ gaṃdhakaṃ tulyaṃ mardyaṃ kanyādravairdinam /
tadgolaṃ dviguṇaṃ gaṃdhaṃ dattvā mūṣādharottaram

ruddhvā saṃdhiṃ viśoṣyātha koṣṭhīyantre dṛḍhaṃ dhaman /
tatsūtaṃ jāyate khoṭaṃ gandhabaddhamidaṃ bhavet

{mercury:: bandhana}
pañcāṅgaṃ rājavṛkṣasya kvāthamaṣṭāvaśeṣitam /
taddravaṃ tu rase kṣiptvā pācyaṃ yāmadvayaṃ śubham

covābaddho bhavatyeṣa khoṭo vai sarvakāryakṛt

{mercury:: bandhana}
candravallyā dravairmardyaṃ tridinaṃ śuddhapāradam /
ṭaṃkaṇena tu saṃyojya vaṭikāṃ kārayed budhaḥ /
koṣṭhayantragataṃ dhmātaṃ khoṭabaddho bhavedrasaḥ

{mercury:: bandhana}
bhallātakānāṃ tailāntaḥ palamekaṃ kṣipedrasam /
yāvattailaṃ pacettāvad ravikṣīraṃ kṣipan kṣipan

ghaṭṭayellohadaṇḍena khoṭabaddho bhavedrasaḥ

{... pāradabandhanam (20)}
dravaiḥ samūlakārpāsyāstridinaṃ mardayetsamam /
ṭaṃkaṇena pādāṃśena vaṭikāḥ kārayellaghu

valmīkamṛttikāmāṣagodhūmānāṃ ca cūrṇakam /
samaṃ mardyodakenaiva mūṣāṃ tenaiva kārayet

tadantarmarditaṃ sūtaṃ vaṭīṃ kṣiptvā dhamed dṛḍham /
khoṭabaddho bhavetso'pi aṃdhamūṣāgato rasaḥ

{pāradabandhanam (21)}
rasaṃ pañcaguṇaṃ caiva dviguṇaṃ śvetaṭaṃkaṇam /
śvetavātāritailānāṃ majjāmaśvasya komalā

tridinaṃ mardayetkhalve naramūtreṇa sādhakaḥ /
tato godhūmacūrṇaṃ tu kṣiptvā kuryādvaṭīḥ śubhāḥ

viśoṣyātha dhametpaścāt kācaṭaṃkaṇayogataḥ /
khoṭabaddho bhavetsūtastejasvī sarvakāryakṛt

{pāradabhasma (1)}
karkoṭī lāṅgalīkaṃdadravairmardyaṃ dinatrayam /
vaṃdhyākarkoṭakīkaṃde taṃ rasaṃ tu niveśayet

kaṃdabāhye mṛdā lepyaṃ sarvato'ṅgulamātrakam /
śuṣkaṃ tuṣapuṭe pacyāt tridinaṃ parivartayan

samuddhṛtya punarmardyaṃ pūrvakaṃdadravais tryaham /
pūrvavatpuṭapākena pārado jāyate mṛtaḥ

{pāradabhasma (2)}
haṃsapādyā dravairmardyaṃ saptāhaṃ śuddhapāradam /
kṣīrakaṃdodarāntarvai kṣiptvā kaṃdaṃ mṛdā lipet

karīṣāgnau dinaṃ pacyātpūrvavanmardayetpunaḥ /
kaṃde kṣiptvā pacettadvattato mardyaṃ ca pūrvavat

kṣīrakaṃdodare ruddhvā mṛdā liptaṃ ca śoṣayet /
samyaggajapuṭe pacyāt mṛto bhavati niścitam

{pāradabhasma (3)}
haṃsapādīkṣīrakaṃdadravairmardyaṃ dinatrayam /
rasaṃ tatkrauñcapādāntaḥ kṣiptvā pādaṃ mṛdā lipet

karīṣāgnau dinaṃ pacyānmardyāt pūrvadravais tryaham /
dinaṃ tadvatpuṭe pacyātpunarmardyaṃ ca pācayet /
jāyate bhasmasūto'yaṃ sarvakāryakarakṣamaḥ

{mukhakaraṇam; silver, copper, lead => gold}
uktānāṃ khoṭabaddhānāṃ mukhaṃ kuryāttaducyate /
vacā caṇḍālinīkaṃdaṃ brahmadaṇḍīyamūlakam

gaṃdhakaṃ ṭaṃkaṇaṃ tulyaṃ bhānudugdhena peṣayet /
caṇamātrāṃ vaṭīṃ kṛtvā pūrvasūte drute kṣipet

ekām ekāṃ dhamanneva vaṭikāsaptakaṃ kramāt /
grasate sarvalohāni yatheṣṭāni na saṃśayaḥ

grāso deyo yathāśaktyā pūrvavanmārayetpunaḥ /
mukhaṃ baddhvā niyuñjīta tāre tāmre bhujaṃgame

tatsarvaṃ jāyate svarṇaṃ vedho daśaguṇo mataḥ /
siddhayogaḥ samākhyātaḥ samyagdṛṣṭvā gurormukhāt

{copper => gold}
sūtābhraṃ gaṃdhakaṃ śuddhaṃ tṛṇajyotoyamūlakam /
tatsarvaṃ mātuliṃgāmlair dinam ekaṃ samaṃ samam

śuddhāni tāmrapatrāṇi tena kalkena lepayet /
ruddhvā gajapuṭe pacyātpunarutthāpya lepayet

evaṃ puṭatraye pakvaṃ tattāmraṃ kāṃcanaṃ bhavet

{copper => gold}
raktasnuhīpayobhiśca tāmrapatrāṇi lepayet /
kārayedagnitaptāni tasmin kṣīre niṣecayet

ityevaṃ saptadhā kuryāllepatāpaniṣecanam /
samāvartya tu tattāmraṃ divyaṃ bhavati kāṃcanam

{copper, lead, silver => gold}
rasakaṃ daradaṃ gaṃdhaṃ gaganaṃ kunaṭī samam /
āraktasnukpayobhistanmardayeddivasatrayam

tena vedhyaṃ drutaṃ tāmraṃ nāgaṃ vā tārameva vā /
sahasrāṃśena taddivyaṃ suvarṇaṃ jāyate dhruvam

{nāgasya svarṇam}
raktasnuhībhavaiḥ kṣīrai rajanīṃ mardayet tryaham /
tena nāgasya patrāṇi praliptāni puṭe pacet /
punarlepyaṃ punaḥ pācyaṃ saptadhā kāṃcanaṃ bhavet

{copper => lead}
padminīpatrapuṣpābhā vijñeyā sthalapadminī /
bhaṅge raktaṃ sravetkṣīraṃ jñātvā tāmuddharettataḥ

pāradaṃ gaṃdhakaṃ tālaṃ māhiṣī kunaṭī samam /
pūrvoktapadminīyuktaṃ mardayeddinasaptakam /
tena śulbaṃ bhavetsvarṇaṃ sahasrāṃśena vedhitam

{tārabījakalkaḥ}
nāgaṃ baṃgaṃ tīkṣṇasāraṃ tāraṃ ca kramaśa uttaram /
pañcānāṃ tu samaṃ tāmraṃ sarvaṃ mūṣāgataṃ dhamet

prakaṭaṃ vaṃkanālena yāvattārāvaśeṣitam /
tattāraṃ padmarāgābhaṃ jāyate drāvayetpunaḥ

vedhyaṃ rasakasatvena pañcamāṃśena yatnataḥ /
tad bhavetkāṃcanaṃ divyaṃ siddhayoga udāhṛtaḥ

{tin => silver}
raktacitrakapañcāṅgaṃ chāyāśuṣkaṃ vicūrṇayet /
tadvāpaṃ drutabaṃgasya ruddhvā ruddhvā trivārakam

deyaṃ tajjāyate tāraṃ śaṃkhakundendusannibham

{copper => gold}
raktacitrakamūlaṃ tu kāṃjikaṃ śuddhapāradam /
kaṅguṇītailasaṃyuktaṃ sarvaṃ kalkaṃ pralepayet

tāmrapatrāṇi taptāni tasmin siñcettrisaptadhā /
etattāmraṃ dviṣaḍbhāgaṃ tāraṃ ṣoḍaśabhāgakam

ekīkṛtya samāvartya tena patrāṇi kārayet /
raktacitrakamūlāni bhallātatailapeṣitam

anena pūrvapatrāṇi praliptāni puṭe pacet /
evaṃ trisaptadhā kuryād divyaṃ bhavati kāñcanam

{copper => gold}
nāginīkandasūtendraraktacitrakamūlakam /
piṣṭvā tenaiva patrāṇi pūrvoktāni pralepayet /
tadvatpacyātpuṭairevaṃ divyaṃ bhavati kāṃcanam

{copper => gold}
jyotiṣmatībhavaistailaistāmrakumbhaṃ prapūrayet /
mukhaṃ ruddhvā kṣipedbhūmau pṛṣṭhe tuṣapuṭaṃ sadā

evaṃ ṣaṇmāsaparyantaṃ puṭayeduddharet kramāt /
bahistuṣapuṭe pacyāttridinaṃ taddivaniśam

tattāmraṃ hāṭakaṃ tulyaṃ samāvartaṃ tu kārayet /
kṣipte jyotiṣmatītaile sarvaṃ bhavati kāṃcanam

{copper => gold}
kṣīrakandabhave kṣīre taptaṃ tāmraṃ niṣecayet /
śatavāraṃ prayatnena tattāmraṃ kāṃcanaṃ bhavet

{silver => gold}
gaṃdhakaṃ rasakaṃ tāpyaṃ pāradaṃ raktacandanam /
mardyaṃ rudantikādrāvairavicchinnaṃ dinatrayam

tena tārasya patrāṇi liptvā ruddhvā puṭe pacet /
ityevaṃ saptadhā kuryāt divyaṃ bhavati kāṃcanam

{copper => gold}
kṛṣṇāyā vātha pītāyā devadālyā phaladravam /
viṣṇukrāntādravaṃ tulyaṃ kṛtvā tenaiva mardayet

saptāhaṃ pāradaṃ śuddhaṃ tatastāmraṃ pralepayet /
ruddhvā gajapuṭe pacyāttatastīvrāgninā dhamet

daśāṃśaṃ tadrasaṃ kṣiptvā divyaṃ bhavati kāṃcanam

{softening of fissured minerals}
vasubhaṭṭarasenātha tridhā siñcet sutāpitam /
loṇavatsphuṭito dhāturmṛduḥ syāt sikthako yathā

{tin => silver}
devadālyā phalaṃ mūlam īśvarīphalajadravam /
piṣṭvā tatkalkavāpena drutaṃ baṃgaṃ dṛḍhaṃ bhavet

bhūyo bhūyas tvayaṃ vāpyastāraṃ bhavati śobhanam

{copper => gold}
kṛṣṇapakṣe caturdaśyāmaṣṭamyāṃ grahaṇe'thavā /
nṛkapāle śvetaguṃjāṃ vāpayecchuddhabhūmiṣu

secayetsalilaṃ nityaṃ yāvatphalavatī bhavet /
mantrapūjāṃ tataḥ kṛtvā puṣye grāhya phalāni vai

śuddhatāmrapalaṃ śvetaṃ viṃśatyuttarakaṃ śatam /
ekaikaṃ pūrvabījānāṃ samyagruddhvā dhamed dṛḍham

tattāmraṃ jāyate tāraṃ śaṃkhakundendusannibham /
tāraṃ tajjāyate svarṇaṃ suśuddhā baddharītikā

{copper => silver}
bhūnāgānāṃ rasairmardyaṃ śuddhaṃ tālaṃ dināvadhi /
tatpiṇḍaṃ haṇḍikāmadhye tālakāṃśaṃ nirodhayet

tāmrapatrāṇi tatpaścāt ḍhaṅkaṇena nirudhya ca /
haṃḍikā bhasmanā pūryā ruddhvā caṇḍāgninā pacet

pañcayāmātsamuddhṛtya niṣkaṭaṃkaṇasaṃyutam /
mūkamūṣāgataṃ dhāmyaṃ guṭikāṃ tāṃ samuddharet

svāṃgaśītaṃ samāhṛtya mūṣāyāṃ prakaṭaṃ dhamet /
vāratrayaṃ kṣipettasmin vaṭikāṃ vedhanānmukham

mukhaṃ tasya bhavettīvraṃ śuddhaṃ baṃgaṃ dravatyalam /
yadā na grasate tasmādvaṭī deyā punaḥ punaḥ

jīrṇe śataguṇe vaṅge tataratāmrasya dāpayet /
drutasya śatabhāgena tattāraṃ jāyate śubham

{nāgamukhakaraṇam}
gaṃdhakaṃ dhūmasāraṃ ca phaṭkarī ṭaṃkaṇaṃ samam /
eraṇḍabījamajjāpi sarveṣāṃ dviguṇā bhavet

bhūnāgāḥ sarvatulyāḥ syuḥ sarvamekatra mardayet /
caṇamātrā vaṭīḥ kāryā khyāteyaṃ vaḍavāmukhā

śuddhanāgaṃ drutaṃ kṣepyaṃ taile eraṇḍake punaḥ /
drāvyaṃ drāvyaṃ punaḥ kṣepyaṃ yāvadvāraṃ śṛtaṃ bhavet

punastasmindrute deyā vaṭikā vaḍavāmukhā /
dvitrivāraṃ prayatnena nāgasyetthaṃ mukhaṃ bhavet

grasate sarvalohāni satvāni vividhāni ca /
yadā na grasate tasmād vaṭī deyā punaḥ punaḥ

{kaṭhinadhātormṛdūkaraṇam}
madhūkapuṣpī yaṣṭīkaṃ raṃbhākaṃdaṃ ghṛtaṃ guḍam /
tilatailam ajākṣīraṃ kṣaudraṃ ca tulyatulyakam

tanmadhye kaṭhinaṃ dhātu tridhā siñcyāt sutāpitam /
mṛdutvaṃ yāti no citraṃ sūtrayogyaṃ na saṃśayaḥ

{kaṭhinadhātor mṛdūkaraṇam (2)}
vasubhadrarasenātha tridhā siñcya sutāpitam /
loṇavatsphuṭito dhāturmṛduḥ syāt sikthakopamaḥ

{kaṭhinadhātor mṛdūkaraṇam (3)}
atisthūlasya bhekasya nivāryāntrāṇi tatra vai /
cūrṇitaṃ ṭaṃkaṇaṃ kṣiptvā tadbhāṇḍasthaṃ khanedbhuvi

trisaptāhaṃ samuddhṛtya tadvāpe mṛdutāṃ vrajet /
svarṇaṃ vā yadi vā raupyaṃ mṛdu syātpatrayogyakam

{abhragrāsī rasaḥ}
tṛṇajyotīyamūlena mātuliṃgarasena ca /
tridinaṃ mardayetsūtaṃ gaganaṃ grasate kṣaṇāt

{guhyākhyasūtena nāgavedhaḥ}
bhūnāgasūkṣmacūrṇaṃ tu ṭaṃkaṇena samaṃ bhavet /
taccūrṇaṃ tu drute nāge vāhyaṃ śataguṇaṃ dhaman

guhyākhyaṃ tadbhavetsiddhaṃ grāsaṃ tasyaiva vakṣyate /
śilāgaṃdhakamākṣīkair bhūnāgadravapeṣitaiḥ

mūṣāgarbhaṃ lipettena guhyākhyaṃ tatra nikṣipet /
bhuktaṃ tasminkṣipetsvarṇaṃ stokaṃ stokaṃ dhamandhaman

grasate bhārasaṃkhyā tu mūṣā lepyā punaḥ punaḥ /
muñcatyasau drute nāge guhyādguhyaṃ prakāśitam

{guhyākhyasūtena vaṅgavedhaḥ}
bhūnāgaṃ ṭaṃkaṇaṃ tulyaṃ sūkṣmacūrṇāni kārayet /
taṃ vāhayed drute baṃge yāvacchataguṇaṃ dhaman

tataḥ śataguṇaṃ baṃgaṃ tasyaivopari vāhayet /
stokaṃ stokaṃ dhamanneva grasate nātra saṃśayaḥ

{guhyavaṅgakaraṇaṃ tena vedhaḥ}
tālakaṃ saiṃdhavaṃ tulyaṃ bhūnāgadravapeṣitam /
mūṣāgarbhe lipettena tadbaṃgaṃ tatra nikṣipet

stokaṃ stokaṃ kṣipettasmin biḍaṃ dattvā dhamandhaman /
bhārasaṃkhyā grasatyevaṃ guhyavaṅgamiti smṛtam

drute baṃge vinikṣiptaṃ yāvatsaṃkhyā na saṃśayaḥ /
tāvad drute na saṃdehaḥ siddhayoga udāhṛtaḥ

kṣiptvātha māhiṣe śṛṅge mardayannagninā pacet /
niṣkamekaṃ bhavedyāvattāvanmardyaṃ kṣipan kṣipan

tad bhavedrasatulyaṃ tu samādāyātha tatsamam

{guhyayogaḥ}
pāradaṃ śuddhahemātha satvaṃ bhūnāgasaṃbhavam /
catvāriṃśannāgabhāgā mardyaṃ jaṃbīrajadravaiḥ

tadgolakaṃ viśoṣyātha kalke bhūnāgasaṃbhave /
mūṣāgarbhe vilepyādau tasyāṃ golaṃ nirodhayet

dhamettīvrāgninā tāvadyāvannātrāvaśeṣitam /
sarvavadgrasate datte guhyākhyaṃ yogamuttamam

{kāmadhenuḥ (1)}
athātaḥ sampravakṣyāmi guṭikābaṃdhamuttamam /
samajīrṇaṃ kṛtaṃ vyoma samato rasaṃ jārayet

ravisaṃkhyāṃśakaṃ śulbaṃ dattvā piṣṭiṃ ca kārayet /
dhānyābhrakasamaṃ gaṃdhaṃ śulbe kṣiptvā vimardayet

tayormūṣākṛtiṃ kṛtvā piṣṭīmadhye vimocayet /
naramāṃsena saṃveṣṭya māṣapiṣṭyā tathaiva ca

pacedatasītailena māsamātraṃ tu sādhakaḥ /
akṣayā kāmadhenuśca vaṅgastambhanakāriṇī

{kāmadhenuḥ (2)}
pārade jāryaṃ kṛṣṇābhraṃ rukmam aṣṭaguṇaṃ yadi /
rañjitaṃ gandharāgeṇa naramāṃsena veṣṭitam

māṣapiṣṭyā pralipyāthātasītailena pācayet /
kāmadhenuriyaṃ khyātā nāgastambhanakāriṇī

{kāmadhenuḥ (3)}
rasātpādāṃśakaṃ hemapiṣṭiṃ kuryācca sundarām /
vilipya kāmadhenuṃ ca nāgadrāve niyojayet

taṃ nāgaṃ kurute rukmaṃ vāñchitārtheṣu siddhidam /
guṭikāṃ kāmadhenuṃ tāṃ pratyahaṃ dhārayenmukhe /
śastrāstrairna ca bhidyeta divyadehamavāpnuyāt

{silver => gold}
śilayā mārito nāgaḥ sūtarājasamanvitaḥ /
rañjito gandharāgeṇa samahemnā ca sārayet /
tāravedhaḥ pradātavyo divyaṃ bhavati kāṃcanam

{lead => gold}
śilayā ravidugdhena nāgapatrāṇi lepayet /
mārayetpuṭayogena divyaṃ bhavati kāṃcanam

{sitasvarṇa => gold}
meṣīkṣīrāmlavargābhyāṃ daradaṃ gharmabhāvitam /
śatadhā tatprayogena śoṣyaṃ peṣyaṃ kharātape

sitasvarṇasya patrāṇi liptvā liptvā puṭe pacet /
evaṃ trisaptadhā kuryād divyaṃ bhavati kāṃcanam

{gaganagrāsaḥ}
tṛṇajātīyamūlaṃ tu mātuliṅgarasena ca /
tridinaṃ mardayetsūtaṃ gaganaṃ grasate kṣaṇāt

siddhairgaṇaiḥ suravarai rasasiddhikāmair baddhaṃ haṭhātparamamantrabalena taiśca /
tasmād viśiṣṭam anujaiḥ kṛtamantrajāpaiḥ kāryaṃ tato rasavare varabandhanaṃ ca