Rasaratnākara · Chapter 2.4

RRĀ, 2, 4
sūtagandhagaganāyasaśulbaṃ māritaṃ ca paramāmṛtīkṛtam /
iṣṭamekamapi mūlikāgaṇaṃ dehasiddhikaramāśu sevitam

mṛtakāntābhrakaṃ sūtaṃ gandhaṃ bhṛṅgaviḍaṅgakam /
tvagvarjaṃ bilvabījaṃ ca pratyekaṃ palaṣoḍaśa

triṃśatpalaṃ tryūṣaṇaṃ ca triṃśattriṃśadghṛtaṃ madhu /
citramūlaṃ daśapalaṃ sarvaṃ cūrṇaṃ viloḍayet

palāni triphalāyāstu viṃśapūrvaṃ catuḥśatam /
kvāthyam aṣṭaguṇais toyair grāhyamaṣṭāvaśeṣitam

kaṣāyaṃ bhāvayettena māsaikaṃ pūrvaloḍitam /
lohapātre khare gharme tatpalārdhaṃ sadā pibet

kṣīraiḥ śayanakāle tu varṣān mṛtyujarāpaham /
bālo nibiḍasaṃdhiś ca jīvec candrārkatārakam

mahārasāyanaṃ divyaṃ kāminīśatatoṣakam /
agnivarṇaṃ kṣipetkṣīre kṛṣṇābhraṃ vahnitāpitam

bhinnapattraṃ tataḥ kṛtvā jalamadhye vinikṣipet /
triṃśatpalāni yatnena maricaṃ palapañcakam

cūrṇitaṃ nikṣipettasmiṃstridinānte samuddharet /
tatsarvaṃ peṣayec chlakṣṇaṃ sitavastreṇa bandhayet

jalapūrṇe ghaṭe gharme dolāyantreṇa dhārayet /
śuṣke toye punastoyaṃ dadyād yāvaj jale gatam

tadabhrakaṃ tato vastraṃ saṃtyajed rakṣayej jalam /
triṃśadbhāgaṃ tataḥ kuryāt taj jalaṃ sābhrakaṃ sudhīḥ

tadbhāgaikena saṃloḍya palaikaṃ śvetataṇḍulāt /
triṃśatpale gavāṃ kṣīre tat pacec cātha śītalam

madhvājyairdvipalairyuktaṃ niṣkaikaiś ca marīcakaiḥ /
sādhako bhakṣayen nityaṃ māsān mṛtyujarāpaham

keśā dantā nakhāstasya patanti hy udbhavanti ca /
vajrakāyo bhavetsiddho vāyuvego mahābalaḥ

amṛtābhrakayogo'yaṃ śambhunā gaditaḥ purā /
mṛtābhraṃ gandhakaṃ śuddhaṃ kaṇā sarvaṃ samaṃ ghṛtaiḥ

karṣaikaṃ bhakṣayen nityaṃ varṣān mṛtyujarāpaham /
koraṇṭakasya pattrāṇi mṛtābhraṃ gandhakaṃ samam

tatsarvaṃ nīlikādrāvaiḥ saptāhaṃ bhāvyamātape /
tatkarṣaikaṃ pibet kṣīrairabdān mṛtyujarāpaham

mṛtābhrakasya karṣaikaṃ gavāṃ kṣīraṃ palaṃ tathā /
samūlapattrāṃ sarpākṣīṃ sārdrāṃ piṣṭvā ca gandhakam

ekīkṛtya pibetsarvaṃ varṣaikena jarāṃ jayet /
vajrakāyaḥ khecaraśca jīved brahmadinatrayam

mṛtābhraṃ kāntalohaṃ ca triphalā māgadhī samam /
pañcāṅgaṃ badarīcūrṇamabhratulyaṃ niyojayet

sitāmadhvājyasaṃyuktaṃ palārdhaṃ bhakṣayetsadā /
hanti varṣāj jarāṃ mṛtyumāyuḥ syādbrahmaṇo dinam

amṛtakrīḍe viṣṇusaṃvaraṇi svāhā /
anena mantreṇa sarve abhrakayogā abhimantrya bhakṣaṇīyāḥ /
mṛtaṃ kāntaṃ tilāḥ kṛṣṇā badarīphalacūrṇakam /
kākatuṇḍībījacūrṇaṃ sarvaṃ tulyaṃ prakalpayet

śālmalīmallipattrāṇāṃ dravair bhāvyaṃ dinatrayam /
tridinaṃ bhṛṅgajairdrāvair bhāvitaṃ śoṣayetpunaḥ

tasmin tulyaṃ guḍaṃ kṣiptvā vaṭikāḥ karṣamātrakāḥ /
rudanty utthadravaiḥ kṣīrair madhvājyābhyāṃ pibet sadā

varṣaikena jarāṃ mṛtyuṃ hanti satyaṃ na saṃśayaḥ /
mṛtaṃ kāntaṃ kṛṣṇatilāṃstriphalāṃ cūrṇayetsamam

śālmalīketakīdrāvairloḍitaṃ kāntapātrake /
sthitaṃ rātrau pibetprātaḥ palārdhaṃ mṛtyunāśanam

vatsaraikāj jarāṃ hanti jīved brahmadinatrayam /
kāntabhasma kaṇācūrṇaṃ nimbaniryāsameva ca

triphalātulyatulyāṃśaṃ madhvājyābhyāṃ palārdhakam /
lihenmāsāṣṭakaṃ nityaṃ jīvedbrahmadinaṃ naraḥ

kuṣṭhakhaṇḍāni saṃpācya kaṣāye traiphale same /
śoṣayitvā vicūrṇyātha tāni kāntaṃ mṛtaṃ samam

madhvājyābhyāṃ lihetkarṣaṃ varṣān mṛtyujarāpaham /
koraṇṭapattracūrṇaṃ tu kāntabhasma tilā guḍam

tulyaṃ bhakṣyaṃ palārdhaṃ tad varṣān mṛtyujarāpaham /
kāntabhasma samaṃ gandhaṃ tailair jyotiṣmatībhavaiḥ

lihen nityaṃ caturniṣkaṃ brahmāyurjāyate naraḥ /
bṛhaspatisamo vācā vatsarādbhavati dhruvam

mṛtatīkṣṇaṃ trayo bhāgāḥ śuddhagandhāṣṭabhāgakam /
gharme bhāvyaṃ trisaptāhaṃ tatsarvaṃ kanyakādravaiḥ

gokṣīrais tat pibetkarṣaṃ jīvedbrahmadinatrayam /
varṣamātrān na saṃdeho divyatejā mahābalaḥ

mṛtaṃ kāntaṃ śilā śuddhā tulyaṃ madhvājyakairlihet /
niṣkaṃ niṣkaṃ tu varṣaikaṃ jīvedbrahmadinatrayam

triniṣkaṃ mṛtatīkṣṇaṃ tu muṇḍaṃ vā kāntameva vā /
pibeddhāroṣṇapayasā vayaḥstambhakaraṃ nṛṇām

varṣadvayaprayogeṇa jīvedācandratārakam /
samyakkāntamaye pātre dhātrīcūrṇaṃ śivāmbunā

rātrau palaikaṃ saṃlipya prātarutthāya bhakṣayet /
valīpalitanirmukto vatsarānmṛtyujidbhavet

lepayetkāntapātrāntaḥ palaikaṃ triphalāmadhu /
divārātraṃ sthitaṃ peyaṃ tannityaṃ tu śivāmbunā /
varṣānmṛtyuṃ jarāṃ hanti jīvedvarṣaśatatrayam

oṃ haḥ amṛte amṛtaśakti amṛtagandhopajīvi niṣpannaṃ candrāmṛtam ājñāpitaṃkuru kurusvāhā he he haṃ haḥ gaṃ iti gandhakalohayorbhakṣaṇamantraḥ /
sarveṣāṃ lohayogānāmanu syātkṣīrapānakam /
āsvādayet svādumustānāṃ svarasaṃ dantapīḍitam

mūlāni bhakṣayet tāsām āsyavairasyaśāntaye /
baddhe koṣṭhe tu dīptāgnau taptaṃ kṣīraṃ pibetsadā

snānamardanatīkṣṇoṣṇaṃ viṣṭambhe sati varjayet /
tāmbūlaṃ bhakṣayennityaṃ sakarpūraṃ muhurmuhuḥ

samyagjīrṇe tu dīptāgnau pibetpaścādbubhukṣitaḥ /
śṛtaṃ kṣīraṃ tato'nnaṃ ca sevyaṃ lauharasāyane

brahmavṛkṣasya pañcāṅgaṃ chāyāśuṣkaṃ sucūrṇitam /
madhvājyābhyāṃ lihetkarṣaṃ varṣaikena jarāṃ jayet

jīvedvarṣasahasraikaṃ divyatejā mahābalaḥ /
brahmavṛkṣasya puṣpāṇi chāyāśuṣkāṇi kārayet

triṃśatpalaṃ tu taccūrṇaṃ caturviṃśatpalaṃ ghṛtam /
ekīkṛtya kṣipedbhāṇḍe taṃ ruddhvā dhānyarāśigam

kṛtvā māsātsamuddhṛtya bhāgān kuryāccaturdaśa /
bhāgaikaṃ bhakṣayennityaṃ bhuñjīta kāntabhājane

evaṃ māsatrayaṃ kuryādvajrakāyo bhavennaraḥ /
tasya mūtrapurīṣābhyāṃ tāmramāyāti kāñcanam

brahmavṛkṣasya bījāni cūrṇitāni ghṛtaiḥ saha /
pūrvavaddhānyamadhye tu kṣiptvā māsātsamuddharet

palaikaikaṃ sadā khādedvatsarānmṛtyujidbhavet /
valīpalitanirmukto jīvedbrahmadinatrayam

brahmabījotthitaṃ tailaṃ gavāṃ kṣīraiḥ paladvayam /
tulyaiḥ pibedbhavenmūrchā siñcettasya mukhe payaḥ

bodhe kṣīraudanaṃ dadyānmāsājjñānī bhavennaraḥ /
dvitīye śukratulyaḥ syāttṛtīye vajravadbhavet

dūraśrāvī caturthe tu pañcame khegatirbhavet /
māsaṣaṭke svayaṃ kartā śivatulyaparākramaḥ

mahākalpāntaparyantaṃ jīvedvarṣaikasevanāt /
brahmavṛkṣamatisthūlaṃ chedayedūrdhvabhāgataḥ

adho rakṣyaṃ trihastaṃ syāttasya mūrdhni bilaṃ kṛtam /
pakvadhātrīphalaiḥ pūryaṃ tatkāṣṭhena nirudhya ca

kuśaistu veṣṭayetsarvaṃ lepyaṃ mṛdgomayaiḥ punaḥ /
āveṣṭya vastrakhaṇḍena limpenmṛdgomayaistataḥ

śuṣke gajapuṭaṃ deyaṃ parito'raṇyakotpalaiḥ /
svāṅgaśītalamuddhṛtya sadravāṇi phalāni ca

kṣipenmadhvājyasaṃyukte bhāṇḍe tānyeva bhakṣayet /
yatheṣṭaṃ bhūgṛhāntasthaḥ kṣīrāhārī jarāṃ jayet

māsadvayena vasudhāṃ chidrāṃ paśyati niścitam /
jīvedbrahmadinaṃ yāvatsarpavatkañcukaṃ tyajet

śvetapālāśapañcāṅgaṃ cūrṇitaṃ madhunā saha /
karṣaikaṃ bhakṣayennityaṃ māsānmṛtyujarāpaham

brahmāyurjāyate siddho varṣamātrānna saṃśayaḥ /
ajāghṛtena tadbījamekaikaṃ bhakṣayetsadā

śarīraṃ bhasmanā mardyaṃ māsānmṛtyujarāṃ jayet /
jīvedbrahmadinaṃ yāvaddivyakāyo bhavennaraḥ

anye yogā yathā rakte brahmavṛkṣe ca ye guṇāḥ /
tathaiva śvetapālāśe bhaveyuḥ sādhakasya vai

amṛtaṃ kuru kuru amṛtamālinyai namaḥ /
anena mantreṇa sarvayogāḥ saptābhimantritā bhakṣaṇīyāḥ /
śuklapakṣe'tha pūrṇāyāṃ puṣye vā śravaṇe tathā /
revatyāṃ vātha sampūjya muṇḍīpañcāṅgamuddharet

chāyāśuṣkaṃ tu taccūrṇaṃ karṣaṃ gopayasā saha /
varṣaikena jarāṃ hanti jīvedvarṣaśatatrayam

tasya mūtrapurīṣābhyāṃ tāmraṃ sauvarṇatāṃ vrajet /
taccūrṇaṃ tu ghṛtairlehyaṃ tadvatsyādbalamadbhutam

oṃ namo'mṛtodbhavāya amṛtaṃ kuru kuru svāhā oṃ hrāṃ saḥ /
iti auṣadhabhakṣaṇamantraḥ /
chāyāśuṣkaṃ devadālīpañcāṅgaṃ cūrṇayettataḥ /
madhvājyābhyāṃ lihetkarṣaṃ varṣānmṛtyujarāṃ jayet

jīvetkalpasahasraṃ tu rudratulyo bhavennaraḥ /
taccūrṇaṃ karṣamātraṃ tu nityaṃ peyaṃ śivāmbunā

pūrvavajjāyate siddhirvatsarānnātra saṃśayaḥ /
taccūrṇaṃ vākucīvahnisarpākṣībhṛṅgarāṭsamam

cūrṇitaṃ karṣamātraṃ tu nityaṃ peyaṃ śivāmbunā /
varṣānmṛtyuṃ jarāṃ hanti chidrāṃ paśyati medinīm

punarnavādevadālyornīrairnityaṃ pibennaraḥ /
devadālyāśca sarpākṣyāḥ palaikaṃ vā śivāmbunā

pibet syāt pūrvavat siddhirvatsarānnātra saṃśayaḥ /
devadālīṃ ca nirguṇḍīṃ pibetkarṣaṃ śivāmbunā /
varṣaikena jarāṃ hanti jīvedācandratārakam

oṃ amṛtagaṇa rudragaṇāmbhaḥ svāhā /
ayaṃ ca grahaṇamantraḥ /
namo bhagavate rudrāya huṃ phaṭ svāhā /
ayaṃ sādhakasya śikhābandhanamantraḥ /
oṃ cara ra ra /
ayaṃ bhakṣaṇamantraḥ

puṣye śvetārkamūlaṃ tu grāhyaṃ chāyāviśoṣitam /
cūrṇakarṣaṃ gavāṃ kṣīraiḥ paladvaṃdvairyutaṃ pibet

māsaṣaṭkāj jarāṃ hanti jīvedbrahmadinatrayam /
dravaṃ śvetārkapattrāṇāṃ bhṛṅgarājadravaiḥ samam

ekīkṛtyātape śuṣkaṃ cūrṇaṃ kṣīraiścaturguṇaiḥ /
mṛdvagninā pacettāvadyāvatpiṇḍatvamāgatam /
tatkarṣaikaṃ ghṛtairlehyaṃ varṣātsyātpūrvavatphalam

oṃ āṃ haṃ vāsaramāline svāhā /
ayaṃ bhakṣaṇamantraḥ /
grāhyaṃ somatrayodaśyāṃ hastikarṇasya pattrakam /
chāyāśuṣkaṃ tu taccūrṇaṃ gavāṃ kṣīraiḥ pibetpalam

varṣamātrājjarāṃ hanti jīvedbrahmadinaṃ naraḥ /
hastikarṇasya pañcāṅgaṃ chāyāśuṣkaṃ vicūrṇitam

karṣamātraṃ pibennityaṃ māsaikamudakaiḥ saha /
āranālais tatas takrair dadhikṣīrājyakṣaudrakaiḥ

pratyekena kramātsevyaṃ māsaikena jarāpaham /
jīvedbrahmadinaṃ sārdhaṃ vajrakāyo mahābalaḥ

oṃ garaviṣaṃ dṛṣṭau gṛhṇāmi svāhā /
hastikarṇagrahaṇamantraḥ /
oṃ amṛtakuṭījātānām amṛtaṃ kuru kuru svāhā /
anena pūjayet /
oṃ amṛtodbhavāya amṛtaṃ kuru kuru nityaṃ namo namaḥ /
bhakṣaṇamantraḥ

rudantyāścaiva pañcāṅgaṃ chāyāśuṣkaṃ vicūrṇayet /
tadardhaṃ musalīcūrṇaṃ musalyardhaṃ phalatrayam

mūlānāṃ katakotthānāṃ tailaṃ pātālayantrake /
grāhayedgarbhayantre vā tattailaṃ kṣālayejjalaiḥ

nālikerajalairvātha kṣālyaṃ pañcāṃśavārakam /
etattailena saṃyuktaṃ pūrvacūrṇaṃ lihetkramāt

karṣādivardhanaṃ kāryaṃ palāntaṃ cātha vardhayet /
evamabdājjarāṃ hanti āyuḥ syādbrahmaṇo dinam

siddhayogo hy ayaṃ khyāto vajrakāyakaro nṛṇām /
puṣyārke grāhayet prātarnirguṇḍīmūlajāṃ tvacam

chāyāśuṣkāṃ vicūrṇyātha karṣamekaṃ pibetsadā /
ajāmūtrapalaikena ṣaṇmāsādamaro bhavet

varṣamātraprayogeṇa śivatulyo bhavennaraḥ /
taccūrṇaṃ kṣīramadhvājyair loḍitaṃ snigdhabhāṇḍake

ruddhvā kṣipeddhānyarāśau māsāduddhṛtya bhakṣayet /
dvipalaṃ varṣaparyantaṃ jīveccandrārkatārakam

taccūrṇārdhapalaṃ cājyair lihetsyātpūrvavatphalam /
taccūrṇaṃ triphalā muṇḍī bhṛṅgī nimbo guḍūcikā

vacā caiṣāṃ samaṃ cūrṇaṃ madhvājyābhyāṃ lihetpalam /
varṣānmṛtyuṃ jarāṃ hanti jīvedbrahmadinatrayam

nirguṇḍīpattrajaṃ drāvaṃ bhāṇḍe mṛdvagninā pacet /
guḍavatpākamāpannaṃ pītaṃ vāntivirekakṛt

niryānti kṛmayastasya mukhanāsākṣikarṇataḥ /
rājayakṣmādirogāṃśca saptāhena vināśayet /
māsatrayājjarāṃ hanti jīvedvarṣaśatatrayam

oṃ namo māya gaṇapataye bhūpataye kuberāya svāhā iti bhakṣaṇamantraḥ /
bhallātako'bhayā vīrā kākatuṇḍyāḥ phalaṃ vacā /
lāṅgalī nimbapattrāṇi sahadevī samaṃ samam

eṣāṃ pātālayantreṇa tailaṃ grāhyaṃ prayatnataḥ /
tattailaṃ nīlikāmūlayuktamardhapalaṃ pibet

vatsarātpalitaṃ hanti āyuḥ syādbrahmaṇo dinam /
tailārdhaniṣke tannasye kṛte syātpūrvavatphalam

kṛṣṇajīrakaprasthaikaṃ tattulyaṃ bhṛṅgajadravam /
yaṣṭī nīlotpalaṃ caiva prati prasthārdhamāharet

pādaprasthaṃ tilāttailaṃ sarvamekatra pācayet /
grāhyaṃ tailāvaśeṣaṃ tannasyaṃ tenaiva kārayet

nasyaṃ cāṅkollatailena kuryānmṛtyujarāpaham /
niṣkārdhaniṣkaṃ varṣaikaṃ jīvedvarṣaśatatrayam

kākamācīphalaṃ piṣṭvā karṣaikamudakaiḥ pibet /
vatsarātpalitaṃ hanti āyuḥ syādbrahmaṇo dinam

guḍūcī musalī muṇḍī nirguṇḍī ca śatāvarī /
vijayā ca samaṃ cūrṇaṃ sitāmadhvājyasaṃyutam

khādetkarṣadvayaṃ nityaṃ vatsarātpalitaṃ jayet /
uktaṃ gorakṣanāthena jīvedbrahmadinatrayam

kṛṣṇāṣṭamyāṃ kṛṣṇasūtrairvṛkṣaṃ śunakaśālmaleḥ /
āveṣṭyāghoramantreṇa rātrau kṛṣṇājakaṃ balim

dattvāghoraṃ japettatra yāvadaṣṭasahasrakam /
tasya mūlatvacaṃ grāhyaṃ chāyāśuṣkaṃ vicūrṇayet

madhvājyābhyāṃ sadā khādetpalaikaṃ vatsarāvadhi /
valīpalitanirmukto jīvedbrahmadinaṃ naraḥ

tasya puṣpāṇi saṃgṛhya gavāṃ kṣīraiḥ sadā pacet /
puṣpavarjaṃ pibetkṣīraṃ māsānmṛtyujarāpaham

phalaikaṃ tasya vṛkṣasya gavāṃ kṣīreṇa pācayet /
phalavarjaṃ pibetkṣīraṃ kṣīramevaṃ pibedbudhaḥ

caturmāsaprayogeṇa vajrakāyo bhavennaraḥ /
jīvetkalpāntaparyantaṃ vāyuvego mahābalaḥ

tasya mūtrapurīṣābhyāṃ tāmraṃ bhavati kāñcanam /
kākamācī bhṛṅgarājaḥ sarpākṣī sahadevikā

samūlā devadālī ca nimbavākucībījakam /
phalāni kākatuṇḍyāśca mūlaṃ brahmāśvagandhayoḥ

nīlakoraṇṭapattrāṇi triphalā ca samaṃ samam /
cūrṇaṃ tatkanyakādrāvairbhāvayetsaptavāsaram

chāyāyāṃ śoṣitaṃ kuryātsitāmadhvājyasaṃyutam /
bhakṣet karṣadvayaṃ nityaṃ varṣamātrājjarāṃ jayet /
jīveccandrārkanakṣatraṃ mahākāyo mahābalaḥ

oṃ ṭhaḥ ṭhaḥ ṭhaḥ saḥ saḥ saḥ amṛte amṛtavarṣiṇi amṛtasaṃjīvani sarvakāmaprade bhagavān somarāja ājñāpayati svāhā iti bhakṣaṇamantraḥ /
triphalā vākucībījaṃ pippalī cāśvagandhikā /
sarvaṃ tulyaṃ kṛtaṃ cūrṇaṃ madhvājyābhyāṃ lihetpalam /
varṣānmṛtyuṃ jarāṃ hanti jīvedbrahmadinatrayam

oṃ hrāṃ hrīṃ hrūṃ saḥ svāhā anena mantreṇa bhakṣayet /
mūlikākalpayogeṣu guñjaikaṃ mṛtapāradam /
pratiyogayutaṃ khādetphalaṃ śataguṇaṃ bhavet /
rasendrasya prabhāveṇa śīghraṃ siddhimavāpnuyāt

asthimudrādharo mantrī lakṣamekaṃ śmaśānataḥ /
japenmahābhayaṃ hanti siddhiṃ datte rasāyanam

tena bhakṣitamātreṇa jīvedācandratārakam /
ajeyo devadaityānāṃ parvatānapi cālayet

oṃ hrīṃ mahābhayerum /
prātaḥ puṣyārkamukhye vividhaśubhadine mantrapūjāvidhānair grāhyaṃ divyauṣadhīnāṃ phaladalakusumaṃ mūlapattraṃ rasaṃ vā /
sarvāṅgaṃ vātha siddhyai sakalamabhinavaṃ sevayed brahmacārī kṣīrānnaṃ codakānnaṃ hitamaśanamidaṃ sarvamanyad vivarjyam