Rasamañjarī · Chapter 10

Rmañj, 10
atha kālasya vijñānaṃ pravakṣyāmi yathāsukham /
jīvitaṃ maraṇaṃ yogī yato jānāti niścayāt

kālagrahasya yasyedaṃ daṃṣṭrāsampuṭake jagat /
adyaiva vā prabhāte vā so'vaśyaṃ bhaviṣyati

rasaṃ rasāyanaṃ yogaṃ kālaṃ jñātvā samācaret /
yasmājjñānaṃ vinā vyarthaṃ tattasmātprocyate'dhunā

dūto raktakaṣāyakṛṣṇavasano dantī jarāmarditas tailābhyaktaśarīrakāyudhakaro dīnāśrupūrṇānanaḥ /
bhasmāṅgārakapālapāṃśumuśalaḥ sūryāstasūryodaye yaḥ sūryasvarasaṃsthito gadavatāṃ kālāya sa syādasau

akasmāccittavikṛtirakasmātpuruṣottamaḥ /
akasmādindriyotpattiḥ sannipātasya lakṣaṇam

śarīraṃ śītalaṃ yasya prakṛter vikṛtir bhavet /
tatrāriṣṭaṃ samāsena vyāptaṃ tatra nibodha me

duṣṭaśabdena ramate sādhuśabdena kupyati /
yaścākasmānna śṛṇute taṃ gatāyuṣamādiśet

yo vā gandhaṃ na gṛhṇāti dīpe śānte ca mānavaḥ /
divājyotīṃṣi yaścāpi jvalitāni ca paśyati

candraṃ sūryaprabhaṃ paśyet sūryaṃ vā candravarcasam /
taḍidvātoṣitān meghān nirmale gagane carān

vimānayānaprāsādairyaśca saṃkulamambaram /
yaśca nīlaṃ mūrtimantam antarikṣaṃ ca paśyati

yastūṣṇam iva gṛhṇāti śītamuṣṇaṃ ca śītavat /
saṃjātaḥ saṃśayo yasya taṃ vadanti gatāyuṣam

viparītena gṛhṇāti bhāvānanyāṃśca yo naraḥ /
dhūmanīhāravāsobhirāvṛtāmiva medinīm

pradīptamiva lokaṃ ca yo'valuptamivāmbhasā /
bhūmim aṣṭādaśākārāṃ lekhābhiryastu paśyati

jyotsnādarśe hi toyeṣu chāyāṃ yaśca na paśyati /
paśyatyekāṅgahīnāṃ ca vaikṛtaṃ cāpi paśyati

śvakākakaṅkagṛdhrāṇāṃ prayātaṃ yakṣarākṣasām /
piśācoraganāgānāṃ vikṛtāmapi yo naraḥ

hrīśriyau yasya naśyetāṃ teja ojaḥ smṛtis tathā /
akasmājjṛmbhate yaśca sa parāsurasaṃśayam

yasyādharoṣṭhaḥ patati sthitaścordhvaṃ tathottaram /
pāśaśaṅkā bhavedyasya durlabhaṃ tasya jīvitam

kuṭilā sphuṭitā vāpi suptā yasya ca nāsikā /
avasphūryati magnā vā sa parāsurasaṃśayam

svarūpaṃ paranetreṣu puttikāṃ yo na paśyati /
yadā hi paṭudṛṣṭiśca tadā mṛtyur adūrataḥ

karṇahīnaṃ yadātmānaṃ paśyatyātmā kathaṃcana /
na sa jīvati loke'smin kālena kavalīkṛtaḥ

rātrau dāho bhavedyasya divā śītaṃ ca jāyate /
kaphapūritakaṇṭhasya mṛtyuścaiva na saṃśayaḥ

caraṇau śītalau yasya śītalaṃ nābhimaṇḍalam /
śirastāpo bhavedyasya tasya mṛtyurna saṃśayaḥ

huṅkāraḥ śītalo yasya phutkāro vahṇisannibhaḥ /
sadā dāho bhavedyasya tasya mṛtyurna saṃśayaḥ

arundhatīṃ dhruvaṃ caiva viṣṇostrīṇi padāni ca /
hīnāyudho na paśyanti caturthaṃ mātṛmaṇḍalam

araśmibimbaṃ sūryasya vahneścaivāṃśuvarjitam /
dṛṣṭvaikādaśamāsāstu naraścordhvaṃ na jīvati

vātaṃ mūtraṃ purīṣaṃ yaḥ suvarṇaṃ rajataṃ tathā /
pratyakṣamathavā svapne daśamāsaṃ na jīvati

kvacit paśyati yo dīptaṃ svarṇavat kānanaṃ naraḥ /
virūpāṇi ca bhūtāni navamāsaṃ na jīvati

sthūlāṅgo'pi kṛśaḥ kṛśo'pi sahasā sthūlatvamālambate śyāmo vā kanakaprabho yadi bhavedgauro'pi kṛṣṇacchaviḥ /
dhīro dhīratayārthadharmanipuṇaḥ śāntopakārī pumān ityevaṃ prakṛte tu śāntacalanaṃ māsyaṣṭame mṛtyudam

pīḍā bhavetpāṇitale ca jihvāmūlaṃ samūlaṃ rudhiraṃ ca kṛṣṇam /
vṛddhiṃ naraḥ kāmapi yanna dṛṣṭvā jīvenmanuṣyaḥ sa hi saptamāsān

madhyāṅgulīnāṃ tritayaṃ viraktaṃ rogaṃ vinā śuṣyati yasya kaṇṭhaḥ /
muhurmuhuḥ prasravaṇaṃ ca jāḍyaṃ ṣaṣṭhe ca māse pralayaṃ prayāti

yasya na sphuraṇaṃ kiṃcid vidyate yasya karmaṇi /
so'vaśyaṃ pañcame māsi skandhārūḍho gamiṣyati

yasya na sphurate jyotiḥ pīḍite nayanadvaye /
maraṇaṃ tasya nirdiṣṭaṃ caturthe māsi niścitam

spandate vṛṣaṇo yasya na kiṃcidapi pīḍitaḥ /
tṛtīye māsi so'vaśyaṃ yamaloke gamiṣyati

tārā divā candraprabhaṃ niśānte yo vidyutaṃ paśyati caiva śvabhre /
indrāyudhaṃ vā svayameva rātrau māsadvaye tasya vadanti nāśam

yasya jānugataṃ marma na kiṃcidapi ceṣṭitam /
māsānte maraṇaṃ tasya na kenāpi vilambyate

kaniṣṭhāṅguliparva syāt kṛṣṇaṃ ca madhyamaṃ yadā /
gatāyuḥ procyate puṃsām aṣṭādaśadināvadhiḥ

ghṛte taile jale vāpi darpaṇe yasya dṛśyate /
śirorahitamātmānaṃ pakṣamekaṃ sa jīvati

śaityaṃ dadhyannapānāni yasya tāpakarāṇi ca /
śītaraśmi bhaveccāruhāsaṃ cātha sunirmalam

na vetti vai cāruhitaṃ na coṣṇaṃ vetti yo naraḥ /
kālajñānena samproktaṃ pakṣamekaṃ sa jīvati

snātamātrasya yasyaite trayaḥ śuṣyanti tatkṣaṇāt /
hṛdayaṃ hastapādau ca daśarātraṃ sa jīvati

nāsāgraṃ rasanāgraṃ ca cakṣuścaivauṣṭhasampuṭam /
yo na paśyetpurādṛṣṭaṃ saptarātraṃ sa jīvati

dhārā bindusamā yasya patate ca mahītale /
saptāhājjāyate mṛtyuḥ kālajñānena kathyate

athātaḥ sampravakṣyāmi chāyāpuruṣalakṣaṇam /
yasya vijñānamātreṇa trikālajño bhavennaraḥ

kālo dūrasthito'syāpi yenopāyena lakṣyate /
taṃ vadanti samāsena yathoddiṣṭaṃ śivāgame

ekānte vijane gatvā kṛtvādityaṃ svapṛṣṭhataḥ /
saṃnirīkṣya nijacchāyāṃ kaṇṭhadeśasamāhitām

tataścākāśamīkṣeta tataḥ paśyati śaṃkaram /
aṣṭottaraśataṃ japtvā tato vai dṛśyate śubham

śuddhasphaṭikasaṃkāśaṃ nānārūpadharo haram /
ṣaṇmāsābhyāsayogena bhūcarāṇāṃ patirbhavet

varṣadvayena he nātha kartā hartā svayaṃ prabhuḥ /
trikālajñatvam āpnoti sa yogī nātra saṃśayaḥ

yatkṛtābhyāsayogena nāsti kiṃcit sudurlabham /
tadrūpaṃ kṛṣṇavarṇaṃ ca paśyati vyomni nirmale

ṣaṇmāsān mṛtyumāpnoti sa yogī nātra saṃśayaḥ /
pīto vyādhibhayaṃ rakto nīlo hatyāṃ vinirdiśet

nānāvarṇe svarūpe'sminudvego jāyate mahān /
pādau gulphaṃ ca jaṭharaṃ vināśakṛśatā bhavet

ardhavarṣeṇa varṣe vā jīvanvarṣadvayena na vā /
vināśo dakṣiṇe bāhau svabandhur mriyate dhruvam

vāmabāhau tathā bhāryā vinaśyati na saṃśayaḥ /
śiro dakṣiṇabāhubhyāṃ vināśo mṛtyumādiśet

aśiro māsamaraṇaṃ vinā jaṅghe divā nava /
aṣṭabhiḥ skandhanāśena chāyāluptena tatkṣaṇāt

tīrthasnānena dānena tapasā sukṛtena vā /
japena jñānayogena jāyate kālabandhanam

rasāyanaṃ ca pūrvoktaṃ guṭikā mṛtajīvanī /
naraiḥ sevyā yathoktaṃ ca paraṃ kālasya bandhanam

rakṣaṇīyamato dehaṃ yato dharmādisādhanam /
śarīraṃ nāśayantyete doṣā dhātumalāśrayāḥ

vaidyanāthatanūjena śālināthena dhīmatā /
śāstramālokya cākṛṣya racitā rasamañjarī