Rasādhyaya, 1-302+com with Ṭīkā · Verses 234xx133x-253xx152x

śilayā mṛtanāgasya tithisaṃkhyāpalāni ca
triṃśatpalāni mūṣāyāḥ prakṣipyāvartayet sudhīḥ //

tataḥ suvarṇamākṣīkaṃ sārdhasaptapalāni ca
stoke stokena kṣiptvātha śanaiścāvartayet sudhīḥ //

yāvatastāmrabhāgasya tatsamānaṃ yadā bhavet
stokaḥ prakāśarājiḥ syāt prathamā parikīrtitā //

tīkṣṇalohasya cūrṇena samānaṃ kāṃsyacūrṇakam
prakṣipyāvartya mūṣāyāṃ kriyate caikapiṇḍakam //

piṇḍādardhaguṇaṃ nāgaṃ kṣiptvā jāryaṃ punaḥ punaḥ
vyoṣarājirbhavejjīrṇe nāge kāṃsyācca ṣaḍguṇe //

śuddhatāmrasya catvāri palānyāvartayet pṛthak
thūthāpalāni catvāri mākṣikaṃ ca catuḥpalam //

palāṣṭānāṃ kṛtaṃ cūrṇaṃ stoke stokena prakṣipet
tāmraśeṣaṃ bhavedyāvad rājirmākṣīkajā matā //

yāvacchulvasya bhāgaikaṃ śanairāvartayetpṛthak
śilayā mṛtanāgāṣṭau thūthābhāgacatuṣṭayam //

piṣṭvā cūrṇīkṛte śulbe stokastokena prakṣipet
nāgarājir bhavecceyaṃ [.... ....] //

rājyabhyucchritalohānāṃ cūrṇaṃ kāryaṃ sadā budhaiḥ
tajjaiśca rājirekaikā jāryā cāṣṭaguṇā rasāt //

maṇaikaṃ rasakasyātha nṛmūtreṇa dinatrayam
kvāthayitvātape śuṣkaṃ yāmaṃ dugdhena pācayet //

śuṣkaṃ cūrṇīkṛtaṃ tasmin kṣepyo'ṣṭāṃśaḥ khalasya ca
ṭaṅkaṇakṣāraturyāṃśo 'ṣṭāṃśaḥ pūrvaguḍasya ca //

sādhite ye mṛdo mūṣe kacūlākāravartule
ekasyāścāntare kṣiptvā mūṣāṃ cūrṇasya vartatām //

aparasyāṃ punarnālaṃ mūrdhaṃ caturdaśāṅgulam
mṛnmayaṃ chidraraṃ budhne vinyasettāmadhomukhīm //

niraghnatat samastaṃ ca parito vastramṛtsnayā
yantras tumbīnalīnāṃ vai kartavyaḥ sattvapātane //

koṭhīmadhye kṣipedyantraṃ babbūlakhadirāvalīm
prabhṛtīnāṃ mṛtāṅgāraiḥ pūrṇaṃ pūrṇaṃ dhamenmuhuḥ //

sadṛśaiśca vidhṛtyāstum bīnalīmadhyato mukhīm
mūṣāmadhyād dhṛtaṃ yāvat sarvaṃ veṣāparīyakam //

śreṣṭhā kaṇayarī khalve peṣyā manaḥśilā budhaiḥ
pidadhyād abhrakeṇāsyaṃ tāṃ kṣiptvā kācakumpake //

dadyātsalavaṇaṃ dagdhā śmacūrṇaṃ mastakopari
vastramṛttikayā limpet samagramapi kumpakam //

bhaṅktvā pakvaghaṭaṃ kaṇṭhe muktvā mṛlliptakumpakam
haṭhāgnir jvālanīyo 'dho yāmaṃ dvādaśakaṃ maṇe //