Rāmāyaṇa-southern-2 (southern recension) · Chapter 2.74

Rāmāyaṇa, Ayodhyākāṇḍa, 74
atha bhūmipradeśajñāḥ sūtrakarmaviśāradāḥ /
svakarmābhiratāḥ śūrāḥ khanakā yantrakās tathā

karmāntikāḥ sthapatayaḥ puruṣā yantrakovidāḥ /
tathā vardhakayaś caiva mārgiṇo vṛkṣatakṣakāḥ

kūpakārāḥ sudhākārā vaṃśakarmakṛtas tathā /
samarthā ye ca draṣṭāraḥ puratas te pratasthire

sa tu harṣāt tam uddeśaṃ janaugho vipulaḥ prayān /
aśobhata mahāvegaḥ sāgarasyeva parvaṇi

te svavāraṃ samāsthāya vartmakarmāṇi kovidāḥ /
karaṇair vividhopetaiḥ purastāt sampratasthire

latāvallīś ca gulmāṃś ca sthāṇūn aśmana eva ca /
janās te cakrire mārgaṃ chindanto vividhān drumān

avṛkṣeṣu ca deśeṣu kecid vṛkṣān aropayan /
kecit kuṭhāraiṣ ṭaṅkaiś ca dātraiś chindan kvacit kvacit

apare vīraṇastambān balino balavattarāḥ /
vidhamanti sma durgāṇi sthalāni ca tatas tataḥ

apare 'pūrayan kūpān pāṃsubhiḥ śvabhram āyatam /
nimnabhāgāṃs tathā kecit samāṃś cakruḥ samantataḥ

babandhur bandhanīyāṃś ca kṣodyān saṃcukṣudus tadā /
bibhidur bhedanīyāṃś ca tāṃs tān deśān narās tadā

acireṇaiva kālena parivāhān bahūdakān /
cakrur bahuvidhākārān sāgarapratimān bahūn /
udapānān bahuvidhān vedikāparimaṇḍitān // RamS_2,74.11* //
sa sudhākuṭṭimatalaḥ prapuṣpitamahīruhaḥ /
mattodghuṣṭadvijagaṇaḥ patākābhir alaṃkṛtaḥ

candanodakasaṃsikto nānākusumabhūṣitaḥ /
bahv aśobhata senāyāḥ panthāḥ svargapathopamaḥ

ājñāpyātha yathājñapti yuktās te 'dhikṛtā narāḥ /
ramaṇīyeṣu deśeṣu bahusvāduphaleṣu ca

yo niveśas tv abhipreto bharatasya mahātmanaḥ /
bhūyas taṃ śobhayāmāsur bhūṣābhir bhūṣaṇopamam

nakṣatreṣu praśasteṣu muhūrteṣu ca tadvidaḥ /
niveśaṃ sthāpayāmāsur bharatasya mahātmanaḥ

bahupāṃsucayāś cāpi parikhāparivāritāḥ /
tatrendrakīlapratimāḥ pratolīvaraśobhitāḥ

prāsādamālāsaṃyuktāḥ saudhaprākārasaṃvṛtāḥ /
patākāśobhitāḥ sarve sunirmitamahāpathāḥ

visarpadbhir ivākāśe viṭaṅkāgravimānakaiḥ /
samucchritair niveśās te babhuḥ śakrapuropamāḥ

jāhnavīṃ tu samāsādya vividhadrumakānanām /
śītalāmalapānīyāṃ mahāmīnasamākulām

sacandratārāgaṇamaṇḍitaṃ yathā nabhaḥ kṣapāyām amalaṃ virājate /
narendramārgaḥ sa tathā vyarājata krameṇa ramyaḥ śubhaśilpinirmitaḥ