Rākṣasakāvya with Ṭīkā · Verses 1-20

kaś cid vanaṃ bahuvanaṃ vicaran vayaḥstho vaśyāṃ vanātmavadanāṃ vanitāṃ vanārdrām |
tarvaryaripradam udīkṣya samutthitaṃ khe nā gām imāṃ madakalaḥ sakalāṃ babhāṣe ||

paśyābjadṛg giritaṭeṣu kumātṛsāhvān bhūdevarājaripuśatrusamāvadhūtān |
vaiśvānarārijaripughnaśarābhibhūtair dṛkśrotraśatrubhir upāsitapuṣpaśobhān ||

paśyādrisārasadṛśībhir amūbhir adbhir āplāvayaty amaragub dharaṇīm ahighnaḥ |
abdaḥ sitābhir asitaḥ śabalaḥ khagābhir vārjaiḥ sitair iva vibhāti vanaṃ prabuddhaiḥ ||

goṣṭhaṃ ghṛtaṃ sughṛtavāḍbhir amūbhir agryaṃ gobhiḥ samuddharati yad bahudhā himaghnaḥ |
tad gavyam ambaragataṃ śikhijātmasaṃsthaṃ viṣyandamānam abhivardhayatīha gojān ||

abruṭpalāśanibhadṛg ghanajātmavaktrā vārcasvarebhanibhagā gajadoḥsamoruḥ |
sīridhvajaprasavatulyaviṣāhvadāsau nrā saṃgatā pramuditā prasamīkṣya vārdam ||

sūryāṃśunāmapatir unnatadṛkpragāmī vāṅnāmabhiḥ parivṛto viṣanāmadābhiḥ |
ukṣā varaḥ pramuditaḥ pratinānadīti garjantam īkṣaṇahitoccayatulyarūpam ||

enaṃ payodapatir unnamitaṃ payodaṃ khasthaṃ mahītalagataḥ pratigarjatīva |
bhittvāvaniṃ vanaruhākṣi śiroruhābhyāṃ saṃprasthito 'mṛtadharair abhiṣicyamānaḥ ||

srotojavikṣatajabhūdharadhāturūpāḥ khasthāḥ payojadaladṛk śuciśukramāse |
māsor nabhasyanabhasor atisaṃpatantas tīvraṃ viṣaṃ viṣadharāḥ parinirvapanti ||

svayonibhakṣadhvajasaṃbhavānāṃ śrutvā ninādaṃ girigahvarasthaḥ |
tamo'ribimbapratibimbadhārī virauti kānte pavanāśanāśaḥ ||

goṣṭhaś ca kuṅkumavapuḥ pratirājate 'sau saptādridaityabhujagottamaśatrugopaḥ |
urvīdharābham acirotthitam abdharaṃ khe dṛṣṭvāhihā pramudito himahāhvayānaḥ ||

kṛṣṇo 'bdharaḥ kṣarati toyam asāv ajasram anyāv imau raṇagatāv iva cebharājau |
anye tv amī dviradavṛndanibhāḥ kṣarantaḥ pracchādayanty amarasiddhavimānamārgam ||

vārdāḥ khagāḥ kṣitidharāgamanaprakāśā nemībharāsabhaturaṃgamatulyaghoṣāḥ |
vāyvīritāḥ kham avatatya vanaṃ kṣaranto vārbhiḥ kṣitiṃ ghṛtadharāḥ pariṇirvapanti ||

eṣo 'ṅghripāśanaripughnasutārisāhvam āruhya tiṣṭhati sugātri bhujaṃgamāriḥ |
yasya svanaiḥ pramuditasya mamādya bāle tāladhvajāvarajasūnuśarāḥ patanti ||

usrāviṣaṃ sthalagato 'tti tathaiva vārjo vārbhyo dvijo haridṛg eṣa daśārdhagūḍhaḥ |
vātāśanaḥ khaśayanaḥ smarati sthalasya cakṣuḥśravā vanabhayāt suraśatrunāmā ||

pakṣy aśvamedhaturagapratimo 'ṣṭavarṇo vārdaṃ na bahv iti samāhvayate hy ahighnaḥ |
bhekas tathaiva khaśayāśayavedyavāṇiḥ śabdaṃ karoty atibhṛśaṃ viṣarāśimagnaḥ ||

nā viṣkirāvanam upetya kumātṛsāhvam ākrīdate madhukalo 'ṅganayā sametaḥ |
anyas tv ayaṃ maṇivarābham upetya gojaṃ nā rāmayā saha payaḥpatijāṃ vṛṇīte ||

syūtaṃ mahat kṣatajavarṇanibhaṃ naro 'sau bibhrat tv amūni ca bhinatti saroruhāṇi |
tajjena cāpi rajasā vanitāṃ vayaḥstho 'py abhyuddharaty avakiraty abhiṣicyamānaḥ ||

paṅke nimagnam ibhavṛndam adaḥ savāri garjat timikṣayadavṛndam ivāvabhāti |
vāryātmanāmaśatacitratanuḥ suparṇo yoṣidvṛtaḥ samadanaḥ pratiroravīti ||

visphoṭitābdhararaveṇa riraṃsur eṣa saṃtrāsito harir anokahaniṣkuṭasthaḥ |
saṃlīyate taḍitam apy abhivīkṣya vignaḥ khāt khaṃ mahattaram asau samanupraviṣṭaḥ ||

etāvad uttamavacaḥ sumanāḥ sa uktvā rantvā dinaṃ saha tayā priyayā hy adīnaḥ |
yuktaṃ caturbhir anaḍudbhir adīnavāḍbhir āruhya yānam atha nā prayayau svageham ||