Rādhākṛṣṇāṣṭakālīyalīlāsmaraṇakramapaddhati · Verses 1-20

śrī śrī rādhā-kṛṣṇāṣṭa-kālīya-līlā-smaraṇa-krama-paddhatiḥ
evaṃ padmopari dhyātvā rādhā-kṛṣṇau tatas tayoḥ /
aṣṭa-kālocitāṃ sevāṃ vidadhyāt siddha-dehataḥ /
guru-vargājñayā tatra pūjayed rādhikā-harī

bāhya-pūjāṃ tataḥ kṛtvā pādyam arghyaṃ krameṇa ca /
vidhi-pūrvaka-śuśrūṣā-nantaraṃ sādhakaḥ kramāt /
dvātriṃśad-akṣara-mukhānj apen mantrān atandritaḥ

mahā-mantraṃ japed ādau daśārṇaṃ tad-antaram /
tataḥ śrī-rādhikā-mantraṃ gāyatrīṃ kāmikīṃ tataḥ

tato yugala-mantraṃ ca japed rāsa-sthalī-pradam /
tato 'ṣṭānāṃ sakhīnāṃ ca japen mantrān yathā-kramam /
tato 'ṣṭa-mañjarīṇāṃ ca sva-sva-mantrān kramāj japet

aṣṭa-kālīya-sūtram āha, yathā--
niśāntaḥ prātaḥ pūrvāhno madhyāhnaś cāparāhnakaḥ /
sāyaṃ pradoṣo rātriś ca kālā aṣṭau yathā-kramam

madhyāhno yāminī cobhau ṣaṇ-muhūrta-mitau smṛtau /
tri-muhūrta-mitā jñeyā niśānta-pramukhāḥ pare

teṣu siddha-dehena sevanaṃ yathā sanat-kumāra-saṃhitāyām,
śrī-nārada uvāca-
bhagavan sarvam ākhyātaṃ yad yat pṛṣṭhaṃ tvayā guro /
adhunā śrotum icchāmi rāga-mārgam anuttamam

śrī-sadāśiva uvāca--
sādhu pṛṣṭhaṃ tvayā vipra sarva-loka-hitaiṣiṇā /
rahasyam api vakṣyāmi tan me nigaditaṃ śṛṇu

parakīyābhimāninyas tathāsya ca priyā janāḥ /
pracureṇaiva bhāvena ramayanti nija-priyam

ātmānaṃ cintayet tatra tāsāṃ madhye manoramām /
rūpa-yauvana-sampannāṃ kiśorīṃ pramadākṛtim

nānā-śilpa-kalābhijñāṃ kṛṣṇa-bhogānurūpiṇīm /
prārthitām api kṛṣṇena tato bhoga-parāṅ-mukhīm

rādhikānucarīṃ nityaṃ tat-sevana-parāyaṇām /
kṛṣṇād apy adhikaṃ prema rādhikāyāṃ prakurvatīm

prītyānudivasaṃ yatnāt tayoḥ saṅgama-kāriṇīm /
tat-sevana-sukhāsvāda-bhareṇātisunirvṛtām

ity ātmānaṃ vicintyaiva tatra sevāṃ samācaret /
brāhma-muhūrtam ārabhya yāvat sāntā mahā-niśā

śrī-nārada uvāca--
harer atra gatāṃ līlāṃ śrotum icchāmi tattvataḥ /
līlām ajānatāṃ sevyo manasā tu kathaṃ hariḥ

śrī-sadāśiva uvāca--
nāhaṃ jānāmi tāṃ līlāṃ harer nārada tattvataḥ /
vṛndā-devīṃ samāgaccha sā te līlāṃ pravakṣyati

avidūre itaḥ sthānāt keśī-tīrtha-samīpataḥ /
sakhībhiḥ saṃvṛtā sāste govinda-paricārikā

śrī-sanat-kumāra uvāca--
ity uktas taṃ parikramya guruṃ natvā punaḥ punaḥ /
vṛndā-sthānaṃ jagāmāsau nārado muni-sattamaḥ

vṛndāpi nāradaṃ dṛṣṭvā praṇamyāpi punaḥ punaḥ /
uvāca taṃ muni-śreṣṭhaṃ katham atrāgatis tava

śrī-nārada uvāca--
tvatto veditum icchāmi naityikaṃ caritaṃ hareḥ /
tad ādito mama bruhi yadi yogyo 'smi śobhane