રાધાકૃષ્ણાષ્ટકાલીયલીલાસ્મરણક્રમપદ્ધતિ · શ્લોક 1-20

શ્રી શ્રી રાધા-કૃષ્ણાષ્ટ-કાલીય-લીલા-સ્મરણ-ક્રમ-પદ્ધતિઃ
એવં પદ્મોપરિ ધ્યાત્વા રાધા-કૃષ્ણૌ તતસ્ તયોઃ ।
અષ્ટ-કાલોચિતાં સેવાં વિદધ્યાત્ સિદ્ધ-દેહતઃ ।
ગુરુ-વર્ગાજ્ઞયા તત્ર પૂજયેદ્ રાધિકા-હરી

બાહ્ય-પૂજાં તતઃ કૃત્વા પાદ્યમ્ અર્ઘ્યં ક્રમેણ ચ ।
વિધિ-પૂર્વક-શુશ્રૂષા-નન્તરં સાધકઃ ક્રમાત્ ।
દ્વાત્રિંશદ્-અક્ષર-મુખાન્જ્ અપેન્ મન્ત્રાન્ અતન્દ્રિતઃ

મહા-મન્ત્રં જપેદ્ આદૌ દશાર્ણં તદ્-અન્તરમ્ ।
તતઃ શ્રી-રાધિકા-મન્ત્રં ગાયત્રીં કામિકીં તતઃ

તતો યુગલ-મન્ત્રં ચ જપેદ્ રાસ-સ્થલી-પ્રદમ્ ।
તતો ઽષ્ટાનાં સખીનાં ચ જપેન્ મન્ત્રાન્ યથા-ક્રમમ્ ।
તતો ઽષ્ટ-મઞ્જરીણાં ચ સ્વ-સ્વ-મન્ત્રાન્ ક્રમાજ્ જપેત્

અષ્ટ-કાલીય-સૂત્રમ્ આહ, યથા--
નિશાન્તઃ પ્રાતઃ પૂર્વાહ્નો મધ્યાહ્નશ્ ચાપરાહ્નકઃ ।
સાયં પ્રદોષો રાત્રિશ્ ચ કાલા અષ્ટૌ યથા-ક્રમમ્

મધ્યાહ્નો યામિની ચોભૌ ષણ્-મુહૂર્ત-મિતૌ સ્મૃતૌ ।
ત્રિ-મુહૂર્ત-મિતા જ્ઞેયા નિશાન્ત-પ્રમુખાઃ પરે

તેષુ સિદ્ધ-દેહેન સેવનં યથા સનત્-કુમાર-સંહિતાયામ્,
શ્રી-નારદ ઉવાચ-
ભગવન્ સર્વમ્ આખ્યાતં યદ્ યત્ પૃષ્ઠં ત્વયા ગુરો ।
અધુના શ્રોતુમ્ ઇચ્છામિ રાગ-માર્ગમ્ અનુત્તમમ્

શ્રી-સદાશિવ ઉવાચ--
સાધુ પૃષ્ઠં ત્વયા વિપ્ર સર્વ-લોક-હિતૈષિણા ।
રહસ્યમ્ અપિ વક્ષ્યામિ તન્ મે નિગદિતં શૃણુ

પરકીયાભિમાનિન્યસ્ તથાસ્ય ચ પ્રિયા જનાઃ ।
પ્રચુરેણૈવ ભાવેન રમયન્તિ નિજ-પ્રિયમ્

આત્માનં ચિન્તયેત્ તત્ર તાસાં મધ્યે મનોરમામ્ ।
રૂપ-યૌવન-સમ્પન્નાં કિશોરીં પ્રમદાકૃતિમ્

નાના-શિલ્પ-કલાભિજ્ઞાં કૃષ્ણ-ભોગાનુરૂપિણીમ્ ।
પ્રાર્થિતામ્ અપિ કૃષ્ણેન તતો ભોગ-પરાઙ્-મુખીમ્

રાધિકાનુચરીં નિત્યં તત્-સેવન-પરાયણામ્ ।
કૃષ્ણાદ્ અપ્ય્ અધિકં પ્રેમ રાધિકાયાં પ્રકુર્વતીમ્

પ્રીત્યાનુદિવસં યત્નાત્ તયોઃ સઙ્ગમ-કારિણીમ્ ।
તત્-સેવન-સુખાસ્વાદ-ભરેણાતિસુનિર્વૃતામ્

ઇત્ય્ આત્માનં વિચિન્ત્યૈવ તત્ર સેવાં સમાચરેત્ ।
બ્રાહ્મ-મુહૂર્તમ્ આરભ્ય યાવત્ સાન્તા મહા-નિશા

શ્રી-નારદ ઉવાચ--
હરેર્ અત્ર ગતાં લીલાં શ્રોતુમ્ ઇચ્છામિ તત્ત્વતઃ ।
લીલામ્ અજાનતાં સેવ્યો મનસા તુ કથં હરિઃ

શ્રી-સદાશિવ ઉવાચ--
નાહં જાનામિ તાં લીલાં હરેર્ નારદ તત્ત્વતઃ ।
વૃન્દા-દેવીં સમાગચ્છ સા તે લીલાં પ્રવક્ષ્યતિ

અવિદૂરે ઇતઃ સ્થાનાત્ કેશી-તીર્થ-સમીપતઃ ।
સખીભિઃ સંવૃતા સાસ્તે ગોવિન્દ-પરિચારિકા

શ્રી-સનત્-કુમાર ઉવાચ--
ઇત્ય્ ઉક્તસ્ તં પરિક્રમ્ય ગુરું નત્વા પુનઃ પુનઃ ।
વૃન્દા-સ્થાનં જગામાસૌ નારદો મુનિ-સત્તમઃ

વૃન્દાપિ નારદં દૃષ્ટ્વા પ્રણમ્યાપિ પુનઃ પુનઃ ।
ઉવાચ તં મુનિ-શ્રેષ્ઠં કથમ્ અત્રાગતિસ્ તવ

શ્રી-નારદ ઉવાચ--
ત્વત્તો વેદિતુમ્ ઇચ્છામિ નૈત્યિકં ચરિતં હરેઃ ।
તદ્ આદિતો મમ બ્રુહિ યદિ યોગ્યો ઽસ્મિ શોભને